Tashqi sovutish usuli smartfon ish unumdorligini sezilarli darajada oshirdi
Zamonaviy smartfonlarning samaradorligi oshgani sayin, ularning uzoq muddatli yuklamalar vaqtida qizib ketishi dolzarb muammoga aylanib bormoqda. Bu haqda One.uz xabar beradi.
Dasturchi va texnologiya ishqibozi Mett Birchler o‘tkazgan noodatiy tajriba shuni ko‘rsatdiki, tashqi sovutish usullari flagman qurilmalarning ish unumdorligini sezilarli darajada oshirishi mumkin. U maxsus sovutish moslamalari o‘rniga oddiy sovuq ichimlik idishidan foydalanib, iPhone smartfonining uzoq vaqt davomidagi ish tezligini 25 foizga oshirishga muvaffaq bo‘ldi.
Ushbu natija mobil protsessorlarning to‘liq quvvat bilan ishlashi bevosita haroratga bog‘liqligini yana bir bor isbotladi. Qizib ketish va ish unumdorligining pasayishi Tajriba davomida mutaxassis yangi avlod protsessorining imkoniyatlarini sinovdan o‘tkazdi.
Asosiy vazifa sifatida murakkab va uzoq davom etadigan nutqni matnga aylantirish jarayoni tanlandi. Dastlabki sinovlar hech qanday qo‘shimcha sovutish choralarisiz amalga oshirildi.
Natijaga ko‘ra, birinchi ishga tushirish vaqtida qurilma soniyasiga 447,9 ta so‘zni qayta ishlagan bo‘lsa, ketma-ket takrorlangan jarayonlardan so‘ng ko‘rsatkichlar keskin tushib keta boshladi. Maʼlum bo‘lishicha, taxminan yettinchi urinishdan boshlab ishlash tezligi soniyasiga 320 so‘z atrofida turg‘unlashgan.
Buning asosiy sababi yuqori intensiv yuklama vaqtida protsessorning haddan tashqari qizib ketishi hamda ichki himoya tizimining faollashishidir. Qurilma ichki qismlarning haroratini xavfsiz chegaralarda saqlab qolish va texnik nosozliklarning oldini olish uchun avtomatik ravishda ishlash chastotasini pasaytirishga majbur bo‘ladi.
Tashqi sovutishning kutilmagan natijasi Ushbu muammoni bartaraf etish uchun Mett Birchler muzlatkichdan yangi chiqarilgan sovuq gazlangan suv idishini olib, uni bevosita smartfonning orqa paneliga qo‘ydi. Shundan so‘ng u dastlabki yigirmata testdan iborat jarayonni qaytadan boshladi.
Qizig‘i shundaki, birinchi bosqichdagi natija sovutishsiz holatdagidan biroz pastroq chiqdi, biroq keyingi bosqichlarda vaziyat butunlay o‘zgardi. Sovutilgan gadjet o‘zining yuqori unumdorligini ancha uzoqroq saqlab qola oldi.
Butun sinov seriyasi davomida o‘rtacha ko‘rsatkich soniyasiga 400,4 so‘zni tashkil etdi. Qizib ketgan qurilmaning avvalgi natijalari bilan solishtirganda, bu taxminan 25 foizlik o‘sishni anglatadi.
Mazkur tajriba shuni tasdiqladiki, agar zamonaviy protsessorlar keraksiz qizishdan himoya qilinsa, uzoq davom etuvchi og‘ir hisob-kitoblarni bajarishda sezilarli darajada tezroq va barqaror ishlay oladi. Garchi bunday usul kundalik hayotda noqulay bo‘lsa-da, u mobil qurilmalarning haqiqiy salohiyati aynan issiqlikni chiqarib yuborish imkoniyatlariga borib taqalishini yaqqol ko‘rsatib berdi.
