Honor suniy intellektga ega yangi flagman smartfonlarini taqdim etdi
Honor kompaniyasi mobil qurilmalar bozorida navbatdagi muhim qadamni tashlab, o‘zining yangi flagman smartfonlarini keng jamoatchilikka taqdim etdi. Bu haqda One.uz xabar beradi.
Olingan ma’lumotlarga ko‘ra, kompaniya rahbari Li Szyan Magic 9 turkumidagi qurilmalar sun’iy intellekt asosida ishlaydigan haqiqiy texnologik vosita sifatida maxsus sertifikatga ega bo‘lgan ilk mahsulotlar ekanini ta’kidladi. Ushbu yutuq brendning ko‘p yillar davomida apparat ta’minoti, tizimli aqlli texnologiyalar va MagicOS operatsion tizimi yo‘nalishida olib borgan keng ko‘lamli izlanishlari natijasidir.
Kompaniya rahbarining fikricha, haqiqiy sun’iy intellektga ega mobil telefon shunchaki o‘rnatilgan dasturlar to‘plami yoki tashqi ko‘rinishdagi o‘zgarishlardan iborat bo‘lmasligi kerak. Yangi yondashuvga binoan, qurilma foydalanuvchining maqsadlari va kundalik odatlarini aniq anglay olishi, turli ilovalar o‘rtasida uzluksiz aloqani ta’minlashi hamda qat’iy sanoat standartlariga javob berishi shart.
Buning uchun tizim darajasidagi intellektual salohiyat talab etiladi. Operatsion tizim va aqlli yordamchining yangi bosqichi Mazkur sertifikatlash jarayoni MagicOS operatsion tizimining tubdan takomillashtirilgani hamda YOYO intellektual yordamchisining yangi bosqichga ko‘tarilganidan dalolat beradi.
Honor o‘zining yangi dasturiy ta’minotini sanoatda tizimli agent tizimini tijoriy jihatdan amaliyotga tatbiq etgan ilk texnologiya sifatida tanishtirmoqda. Bu esa mobil qurilmalarning boshqaruv tizimida yangi davrni boshlab berishi kutilmoqda.
Yangilangan YOYO yordamchisi oddiy ovozli buyruqlarni bajaruvchi vosita maqomidan chiqib, bir nechta ilovalar doirasida murakkab vazifalarni mustaqil hal qila oladigan tizim darajasidagi agentga aylandi. Mutaxassislarning qayd etishicha, aynan mana shu texnologik qismlar majmui Magic 9 seriyasini bozordagi boshqa raqobatchilaridan ajratib turadi va uni haqiqiy aqlli telefonlar qatoriga qo‘shadi.
Mobil bozordagi texnologik poyga Ushbu e’lon mobil aloqa vositalari bozorida sun’iy intellekt imkoniyatlari bo‘yicha raqobat qanchalik keskinlashib borayotganini yana bir bor isbotladi. Avvalroq Honor rahbariyati Magic 7 qurilmasini ovozli buyruq orqali qahva buyurtma qilish va to‘lov jarayonlarini mustaqil amalga oshira oladigan ilk aqlli telefon sifatida ko‘rsatgan edi.
Shuningdek, quvvat tejamkorligi va yuqori sifatli suratga olish imkoniyatlariga ega bo‘lgan Magic 9 Pro Max modeli ham taqdim etilgan. Biroq sun’iy intellektga asoslangan telefonlar bozorida faqatgina Honor emas, balki boshqa yirik ishlab chiqaruvchilar ham yetakchilik uchun kurash olib bormoqda.
Xususan, boshqa kompaniyalar ham o‘z qurilmalarini dunyodagi birinchi aqlli smartfon sifatida e’lon qilib, ko‘p bosqichli vazifalarni qo‘shimcha so‘rovlarsiz bajaradigan tizimlarni namoyish etmoqda. Bu esa yaqin kelajakda mobil qurilmalarning inson hayotidagi o‘rni butunlay o‘zgarishidan dalolat beradi.
