«OnePlus 16» smartfoni unumdorlik bo'yicha yangi jahon rekordini o'rnatdi
Smartfonlar bozorida yuqori texnologik poyga yangi bosqichga chiqdi va OnePlus kompaniyasi o‘zining navbatdagi flagmani bo‘lmish OnePlus 16 modeli bilan unumdorlik borasida mutlaq jahon rekordini o‘rnatdi. Bu haqda One.uz xabar beradi.
Rasmiy ma’lumotlarga ko‘ra, ushbu qurilma AnTuTu sinov dasturida 5,63 million balldan yuqori natija qayd etib, hozirgi kunda mavjud bo‘lgan barcha smartfonlarni ortda qoldirdi. Avvalroq tarqalgan taxminiy ma’lumotlarda ko‘rsatkich biroz pastroq bo‘lishi aytilgan edi, biroq yakuniy natijalar qurilmaning o‘ta yuqori quvvatga ega ekanligini isbotladi.
Yangi avlod protsessori va o‘yin imkoniyatlari Ushbu ulkan natijaga erishish uchun OnePlus 16 smartfoni eng so‘nggi, 2 nanometrli texnologik jarayon asosida tayyorlangan Snapdragon 8 Elite Extreme Gen 6 protsessori bilan jihozlangan. Qurilmaning barqaror ishlashini ta’minlash maqsadida muhandislar Qualcomm mutaxassislari bilan hamkorlikda Wind Chaser deb nomlangan maxsus dasturiy tizimni joriy etishdi.
Mazkur tizim smartfon uzoq vaqt davomida og‘ir yuklamalar ostida ishlaganda ham qizib ketmasligini va kadrlar almashinuvi tezligi pasayib ketmasligini kafolatlaydi. Smartfon ayniqsa o‘yin ixlosmandlari uchun misli ko‘rilmagan imkoniyatlarni taqdim etadi.
Xususan, mashhur o‘yinlarda tasvir chastotasi soniyasiga 185 kadrgacha ko‘tarilishi mumkin. Asosiy hisoblash markaziga yordam berish uchun qurilmaga yana uchta qo‘shimcha chip o‘rnatilgan.
P4 Super Display chipi tasvir sifatini yaxshilasa, T3 Touch moduli sensorli boshqaruvning tezkorligini oshiradi. G3 e-sports chipi esa internet aloqasining barqarorligini ta’minlab, o‘yin davomida uzilishlarning oldini oladi.
Ekran va texnik ko‘rsatkichlar Qurilmaning tashqi ko‘rinishi va displey imkoniyatlari ham e’tiborga loyiq. Smartfon 6,78 dyuymli, o‘ta yupqa hoshiyali BOE OLED ekrani bilan ta’minlangan bo‘lib, uning chekkalari butunlay tekis shaklda ishlangan.
Ekranning yangilanish chastotasi 185 gersni tashkil etishi tasvirning nihoyatda ravon harakatlanishiga xizmat qiladi. Shuningdek, smartfon 9000 milliamper-soat sig‘imli ulkan akkumulyatorga ega bo‘lishi kutilmoqda, bu esa zamonaviy flagmanlar orasida eng yuqori ko‘rsatkichlardan biridir.
Kamera borasida ham OnePlus 16 o‘zidan oldingi modellardan sezilarli darajada ustun turadi. Asosiy kamera 200 megapikselli yuqori aniqlikdagi sensor bilan jihozlangan bo‘lib, unga 50 megapikselli periskop va keng burchakli linzalar hamrohlik qiladi.
Bu esa foydalanuvchilarga uzoqdagi obektlarni sifatini yo‘qotmagan holda yaqinlashtirib suratga olish imkonini beradi. Mazkur texnologik yangilikning rasmiy taqdimoti joriy yilning 12-oktabr kuni bo‘lib o‘tishi rejalashtirilgan.
