Yaponiya korporatsiyasi Oydan Yerga energiya uzatish loyihasini taqdim etdi
Yaponiyaning yirik qurilish va muhandislik korxonasi bo‘lmish Shimizu korporatsiyasi koinot texnologiyalari tarixidagi eng dadil va ulkan g‘oyalardan biri hisoblangan Luna Ring loyihasini taqdim etdi. Bu haqda One.uz xabar beradi.
Ushbu konsepsiyaga ko‘ra, Oy ekvatori bo‘ylab minglab kilometrga cho‘zilgan quyosh panellari halqasi barpo etiladi. Mazkur tizim yordamida ishlab chiqarilgan cheksiz miqdordagi toza elektr energiyasi to‘g‘ridan to‘g‘ri Yer sayyorasiga uzatiladi.
Ushbu texnologik yangilik insoniyatni global energetik tanqislik va ekologik muammolardan butunlay xalos etish maqsadida ishlab chiqilgan bo‘lib, u kelajak energiyasiga bo‘lgan qarashlarni tubdan o‘zgartirishi kutilmoqda. Koinotdagi ulkan energiya majmuasining ishlash tamoyili Taklif etilgan konsepsiya ilmiy-fantastik asarlarni eslatsa-da, u aniq muhandislik asoslariga tayanadi.
Oy yuzasida ob-havo o‘zgarishlari, bulutlar yoki atmosfera yo‘qligi sababli quyosh nurlari doimiy va to‘xtovsiz tushib turadi. Ekvator bo‘ylab joylashtirilgan panellar zanjiri kunning istalgan vaqtida quyosh nurini tutib qolish va to‘xtovsiz energiya ishlab chiqarish imkonini beradi.
Mutaxassislarning dastlabki hisob-kitoblariga ko‘ra, tizimning quvvati 13 000 teravattgacha yetishi mumkin. Bu ko‘rsatkich bugungi kunda butun dunyo bo‘ylab iste’mol qilinayotgan jami elektr energiyasi miqdoridan bir necha barobar ko‘pdir.
Hosil bo‘lgan quvvat simlarsiz aloqa usulida, ya’ni yuqori aniqlikdagi mikroto‘lqinlar hamda lazer nurlari yordamida fazo orqali Yerdagi maxsus qabul qiluvchi stansiyalarga yuboriladi. Qurilish jarayoni va loyihaning amalga oshish imkoniyatlari Oy sharoiti inson salomatligi uchun xavfli va o‘ta og‘ir bo‘lgani sababli, qurilish jarayonini to‘liq avtomatlashtirish rejalashtirilgan.
Barcha montaj ishlari, panellarni o‘rnatish va infratuzilmani shakllantirish vazifalarini Yerdan turib boshqariladigan aqlli robotlar brigadasi bajaradi. Shuningdek, xarajatlarni kamaytirish maqsadida Oy tuprog‘i va undagi minerallardan qurilish materiallari sifatida foydalanish ko‘zda tutilgan.
Hozirgi bosqichda ushbu loyiha hali tasdiqlangan reja emas, balki kelajak uchun taklif etilgan ilmiy konsepsiya hisoblanadi. Tizimni amaliyotga tatbiq etish uchun trillionlab dollar miqdorida sarmoya, kosmik tashuvlar narxini pasaytirish hamda energiyani xavfsiz uzatishning texnik jihatlarini to‘liq isbotlash talab etiladi.
Shunga qaramay, mazkur tashabbus insoniyatning toza energiyani koinot kengliklaridan olishga bo‘lgan intilishining yorqin namunasidir.
