«Porshe» zavodlarida avtomobil sifatini nazorat qilishda raqamli texnologiyalar qo'llanilmoqda
Zamonaviy avtomobilsozlik sanoatida sifatni ta’minlash jarayoni yuqori texnologiyali robotlar va inson tajribasining o‘zaro uyg‘unligiga tayanadi. Bu haqda One.uz xabar beradi.
Xususan, Germaniyaning Porsche kompaniyasi o‘z zavodlarida avtomobilning eng murakkab qismlaridan biri bo‘lgan orqa o‘q tizimini yig‘ishda hamda tekshirishda raqamli nazorat usullaridan keng foydalanmoqda. Ushbu jarayonda har bir detal soniyalar ichida skanerlanib, ma’lumotlar bazasiga kiritiladi, biroq yakuniy xulosa va nozik texnik holatlarni aniqlash baribir malakali mutaxassislar zimmasida qolmoqda.
Texnologik murakkablik va sifat nazorati Avtomobilning orqa o‘q qismi haydash dinamikasi, yo‘lovchilar qulayligi va harakat xavfsizligini ta’minlovchi asosiy mexanik tugun hisoblanadi. Bugungi kunda elektromobillarning ommalashishi ushbu tizimni yanada murakkablashtirdi, chunki endilikda orqa o‘qqa nafaqat mexanik qismlar, balki kuchli elektr dvigatellari va murakkab elektron boshqaruv bloklari ham o‘rnatilmoqda.
Porsche mutaxassislari bunday murakkablikni inobatga olgan holda, har bir detalni masofadan turib o‘lchaydigan va ulagichlarning aniqligini tekshiradigan maxsus robotlashtirilgan tizimni joriy etishgan. Mazkur tizimning o‘ziga xosligi shundaki, yig‘uv liniyasidan o‘tayotgan har bir mahsulot ko‘p bosqichli skanerdan o‘tkaziladi.
Har bir ulanish nuqtasi va har bir detalning holati yuqori aniqlikdagi kameralar yordamida suratga olinadi. Ushbu tasvirlar va texnik ko‘rsatkichlar maxsus serverlarda kamida uch yil davomida saqlanadi.
Bu chora kelgusida avtomobilda biron-bir nosozlik aniqlansa, nosozlik sababini ishlab chiqarish bosqichiga qaytib, aniq tahlil qilish imkonini beradi. Bunday yondashuv xaridorlar ko‘zi bilan ko‘ra olmaydigan, ammo mashinaning uzoq muddatli ishonchliligini kafolatlaydigan muhim omildir.
Inson omilining o‘zgarmas ahamiyati Sanoat robotlari o‘tgan asrning 70-yillaridan buyon zavodlarda mehnat qilib kelayotgan bo‘lsa-da, Porsche muhandislari inson mehnatini hamon ajralmas qism deb hisoblashadi. Sun’iy intellekt va avtomatlashtirilgan tizimlar takrorlanuvchi, zerikarli va o‘ta aniqlik talab qiladigan vazifalarni mukammal bajarsa-da, ular inson sezgirligi o‘rnini bosa olmaydi.
Tajribali texnik xodimlar robotlar bilan yonma-yon ishlaydi va faqat inson his-tuyg‘ulari hamda ko‘p yillik tajribasigagina tayanadigan vazifalarni amalga oshiradi. Masalan, tormoz tizimidagi juda past chastotali g‘ichirlashni yoki detallarning bir-biriga tegishi natijasida hosil bo‘ladigan shubhali tovushlarni eng zamonaviy datchiklar ham doim ham aniqlay olmaydi.
Malakali mutaxassis esa o‘zining o‘tkir ko‘zi va eshitish qobiliyati orqali bunday kichik nuqsonlarni darhol payqaydi. Shu tariqa, zamonaviy avtomobilsozlik sanoati maksimal darajada raqamlashtirilgan bo‘lishiga qaramay, har bir yangi mashina mukammallikka erishishi uchun haligacha inson nazorati va mutaxassisning mas’uliyati hal qiluvchi ahamiyatga ega bo‘lib qolmoqda.
