Metanol bilan ishlovchi yangi gibrid dvigatel taqdim etildi
Jahon avtomobilsozlik sanoatida elektr transport vositalari jadal rivojlanayotgan bo‘lsa-da, muqobil yoqilg‘i turlari ustidagi izlanishlar ham to‘xtab qolgani yo‘q. Bu haqda One.uz xabar beradi.
Horse Powertrain kompaniyasi elektromobillar masofasini uzaytirishga mo‘ljallangan, metanol yoqilg‘isida ishlovchi yangi D20 Methanol gibrid quvvat agregatini taqdim etdi. Ushbu texnologiya ichki yonuv dvigateli va yuqori samarali elektr motorini birlashtirgan holda, atrof-muhitga zararni kamaytirish va avtomobilning bir marta quvvatlanishdagi yurish masofasini sezilarli darajada oshirishga xizmat qiladi.
Hozirgi vaqtda Xitoy dunyo bo‘yicha metanol ishlab chiqarish va undan foydalanishda yetakchi o‘rinni egallab, global bozorning 60 foizini nazorat qilmoqda. Avvalari ushbu yoqilg‘i asosan ko‘mirdan olingan bo‘lsa, bugungi kunda ekologik toza e-metanol ishlab chiqarishga katta sarmoyalar kiritilmoqda.
Xitoy hukumati 2019-yildan buyon sof metanol bilan ishlaydigan transport vositalarini qo‘llab-quvvatlab kelayotgani Horse Powertrain muhandislari uchun yangi qurilmani yaratishda asosiy turtki bo‘ldi. Yangi qurilmaning texnik imkoniyatlari D20 Methanol agregati 2,0 litrli turbo dvigatel hamda o‘ta ixcham tuzilishga ega bo‘lgan maxsus motor-generatordan tashkil topgan.
Ushbu motor an’anaviy silindrsimon modellardan farqli ravishda ancha ixcham bo‘lib, uning uzunligi deyarli ikki barobar qisqartirilgan. Shunga qaramay, qurilmaning energiya zichligi 63 foizga yuqori bo‘lib, bu kichik hajmda katta quvvat ishlab chiqarish imkonini beradi.
Mazkur tizimda zamonaviy kremniy-karbid quvvat modullaridan foydalanilgani sababli, elektr energiyasi yo‘qotilishi minimal darajaga tushirilgan. Natijada elektr samaradorligi 96,4 foizga, yoqilg‘i energiyasini foydali quvvatga aylantirish koeffitsiyenti esa 47 foizga yetkazildi.
Bu ko‘rsatkichlar zamonaviy gibrid tizimlar orasida eng yuqori natijalardan biri hisoblanadi. Ekologik tozalik va chidamlilik Metanol yoqilg‘isining asosiy kamchiliklaridan biri sovuq ob-havoda dvigatelni o‘t oldirish bilan bog‘liq edi.
Yangi ishlab chiqilgan yuqori energiyali tizim sharofati bilan D20 agregati hatto 35 daraja sovuqda ham muammosiz ishga tushadi. Bu esa texnologiyadan turli iqlim sharoitlariga ega bo‘lgan mamlakatlarda keng foydalanish imkonini yaratadi.
Ekologik nuqtayi nazardan ham ushbu agregat eng qat’iy xalqaro talablarga javob beradi. Uning zaharli gazlar ajratish miqdori Xitoy va Yevropa Ittifoqining eng so‘nggi standartlariga to‘liq mos keladi.
Bunday texnologik yechimlar kelajakda nafaqat Xitoyda, balki butun dunyoda ekologik toza transport tizimini rivojlantirishda muhim bosqich bo‘lishi kutilmoqda.
