Rossiyada mashhur shokolad va shirinliklar savdosi to‘xtatilishi mumkin. Bu haqida Zamin.uz xabar berdi.
Buning asosiy sababi narxlar bo‘yicha kelishmovchilikdir. Rossiyadagi yirik chakana savdo tarmoqlaridan biri bo‘lgan X5 Group o‘z tarkibiga kiruvchi Pyatyorochka va Perekryostok supermarketlarida Mars kompaniyasiga tegishli Snickers, Twix, M&M's, Orbit kabi mahsulotlarni xarid qilishni to‘xtatdi.
Bu haqda Pravilamag nashri ma’lum qildi. X5 matbuot xizmati xabar berishicha, mazkur qaror Mars kompaniyasining taklif qilgan narxlari yuqori bo‘lgani sababli qabul qilingan.
Kompaniya mahsulot narxlarini asossiz ravishda oshirilgan deb hisoblamoqda. Mars kompaniyasi esa ushbu qarordan afsusda ekanligini bildirib, ikki tomon uchun ham foydali yechim topishga umid qilmoqda.
Ma’lumotlarga ko‘ra, Mars kompaniyasining hozirgi zaxiralari taxminan ikki oyga yetadi. Avgust va sentabr oylarida ushbu mahsulotlar do‘konlardan butunlay yo‘qolishi mumkin.
Biroq X5 vakillari ta’kidicha, raflar bo‘sh qolmaydi va Mars o‘rniga boshqa ishlab chiqaruvchilarning o‘xshash mahsulotlari taklif etiladi. Mars kompaniyasi dunyodagi eng yirik konditer mahsulotlar ishlab chiqaruvchilaridan biridir.
Kompaniyaga Snickers, Twix, Bounty, Mars, Milky Way, M&M's, Skittles, Orbit, Eclipse hamda Korkunov shokoladlari kabi mashhur brendlar kiradi. Shuningdek, 2025 yil boshlarida Mars va Mondelez kompaniyalari inflyatsiya fonida o‘z mahsulotlariga narxlarni oshirishini ma’lum qilgan edi.
Bu holat bozorda narxlar o‘zgarishiga sabab bo‘lmoqda.
