Tramp Kaliforniya yong‘inlari hayriyasini tanqid qildi
Donald Tramp Kaliforniyada o‘rmon yong‘inlari jabrdiydalariga yordam berish maqsadida tashkil etilgan FireAid hayriya tashabbusi atrofida jiddiy shubha va mojaro yuzaga kelganini bildirdi. Bu haqida Zamin.uz xabar berdi.
U o‘zining Truth Social sahifasida ushbu tashabbusni “firibgarlik va demokratlardan ilhomlangan falokat” deb atadi. Trampning ta’kidlashicha, yig‘ilgan 100 million dollar mablag‘ yo‘qolgan.
Kaliforniyada yuz bergan o‘rmon yong‘inlari katta talafotga sabab bo‘ldi. Ayniqsa, Los-Anjeles hududida yanvar oyida ro‘y bergan yong‘inda 30 dan ortiq odam halok bo‘lib, minglab uylar vayron bo‘ldi, ko‘plab oilalar boshpanasiz qoldi.
Ushbu falokatdan so‘ng jamoat tashkilotlari, xususan demokratlar partiyasiga yaqin guruhlar hayriya aksiyasi boshladi va jabrlanganlarga yordam uchun mablag‘ yig‘di. Tashabbus doirasida taniqli san’atkorlar Billi Aylish, Ledi Gaga, Keti Perri va boshqa mashhurlar ishtirokida hayriya konserti o‘tkazildi.
Bu tadbirda 100 million dollardan ortiq mablag‘ yig‘ildi. Fox News telekanali xabariga ko‘ra, pul mablag‘lari bir nechta nodavlat tashkilotlar o‘rtasida taqsimlangan, ammo to‘g‘ridan-to‘g‘ri jabrlanganlarga yetkazilmagan.
Mahalliy aholi va norozilar bu holatga keskin munosabat bildirdi. Tramp o‘z chiqishida mablag‘larning qayerga va qanday sarflangani haqida ochiqlik yo‘qligini, bu esa hayriya tashabbuslariga bo‘lgan ishonchni pasaytirishini ta’kidladi.
U FireAidni “demokratlar tomonidan tashkil etilgan yana bir firibgarlik” deb atadi. Mutaxassislar va siyosiy sharhlovchilar bunday mojaro jamiyatda hayriya va yordamga bo‘lgan ishonchni zaiflashtirishi, natijada kelajakda muhtojlarga yordam yetib bormasligiga sabab bo‘lishi mumkinligini ta’kidlamoqda.
Shuningdek, moliyaviy nazoratning yetishmasligi ayniqsa ko‘p ehtiyojmandlarga salbiy ta’sir ko‘rsatadi. Kaliforniyadagi ushbu voqea hayriya mablag‘larining ochiq va shaffof taqsimlanishi masalasini yana kun tartibiga chiqardi.
Jabrlanganlar va ularning oilalari esa hali ham chinakam yordam kutmoqda.
