Xitoyda uch yoshgacha bolalarga nafaqa beriladi
Xitoy Xalq Respublikasi tug‘ilish ko‘rsatkichining izchil pasayishi fonida aholining ko‘payishiga qaratilgan yangi va samarali choralarni joriy etmoqda. Bu haqida Zamin.uz xabar berdi.
Yangi qarorga muvofiq, mamlakatda uch yoshgacha bo‘lgan har bir bola uchun ota-onalarga yiliga 3600 yuan (taxminan 500 dollar) miqdorida moliyaviy yordam beriladi. Bu haqda «Sinxua» agentligi rasmiy ma’lumot berdi.
Ushbu tashabbus Xitoyda umummilliy miqyosda birinchi marta amalga oshirilayotgan bolalar nafaqasi sifatida tarixga kiradi. Uning asosiy maqsadi bolali oilalarni qo‘llab-quvvatlash va tug‘ilish darajasini oshirishdir.
Tahlillarga ko‘ra, yiliga taxminan 20 million oila ushbu nafaqadan foyda oladi. Mamlakat rahbariyati tug‘ilish ko‘rsatkichini oshirishga ilk bor harakat qilmayapti.
1970-yillardan 2015 yilgacha amal qilgan “bir oila — bir bola” siyosati demografik muvozanatga salbiy ta’sir ko‘rsatgan edi. Ushbu siyosat bekor qilinganidan so‘ng Xitoy turli rag‘batlantirish choralari bilan tug‘ilish darajasini ko‘tarishga harakat qilmoqda.
Shuningdek, hukumat moddiy yordamdan tashqari, ijtimoiy va mafkuraviy kampaniyalar orqali ham fuqarolarning turmush qurish hamda farzand ko‘rish borasidagi qarashlarini o‘zgartirishga intilmoqda. Masalan, partiya yig‘ilishlarida uylanish va farzandli bo‘lish g‘oyasi targ‘ib qilinmoqda, yolg‘iz shaxslarni oila qurishga, oilalarni esa ko‘proq farzand ko‘rishga undash ishlari olib borilmoqda.
Biroq, rasmiy ma’lumotlarga ko‘ra, 2024 yil yakunlarida Xitoyda tug‘ilish darajasi ketma-ket uchinchi yil pasayishda davom etdi. Bu esa davlatning aholining qarish muammosiga qarshi kurashini kuchaytirishni talab qiladi.
Ekspertlar fikricha, tug‘ilishni rag‘batlantirishda faqat moddiy yordamlar emas, balki ijtimoiy infratuzilmalar, jumladan bog‘chalar, maktablar, tibbiy xizmat sifati hamda ayollarni ish va oilaviy hayot o‘rtasida muvozanat saqlashda qo‘llab-quvvatlash mexanizmlari katta ahamiyatga ega. Zamin.uz tahririyati Xitoyning demografik siyosatdagi yangi qadamlarini diqqat bilan kuzatib boradi va bu o‘zgarishlarning O‘zbekiston hamda boshqa mamlakatlarga ta’sirini tahlil qilishni davom ettiradi.
