Xitoyda 3 yoshgacha bolaga pul beriladi
Xitoy hukumati tug‘ilish ko‘rsatkichlarining kamayishi sababli aholining sonini oshirish maqsadida yangi moliyaviy yordam dasturini joriy etdi. Bu haqida Zamin.uz xabar berdi.
Davlatning yetakchi axborot agentligi “Sinxua”ning xabariga ko‘ra, 3 yoshgacha bolasi bor oilalarga har yili 3600 yuan, ya’ni taxminan 500 AQSH dollari miqdorida to‘lov beriladi. Ushbu yordam 2022–2024 yillarda tug‘ilgan bolalar uchun mo‘ljallangan bo‘lib, 20 milliongacha oilani qamrab olishi kutilmoqda.
Rasmiy ma’lumotlarga ko‘ra, 2024 yilda Xitoyda 9,5 million chaqaloq tug‘ilgan, bu esa 2017 yilga nisbatan deyarli ikki barobar kamayishni anglatadi. Hukumat tug‘ilish darajasining pasayishiga qarshi kurashish uchun “ona kapitali”ga o‘xshash yangi dastur ishlab chiqmoqda.
Iqtisodchi Zichun Xuaning fikricha, bu yordamlar qisqa muddatda tug‘ilish yoki ichki bozor iste’molida sezilarli o‘zgarishlarga olib kelmasligi mumkin. Biroq, bu tashabbus aholiga bevosita moliyaviy yordam ko‘rsatishda yangi davr boshlanishini bildiradi va davlat budjetidan ajratiladigan transfertlar hajmini oshirishga imkon yaratadi.
Xitoyda 1979 yildan 2015 yilgacha “bir oila – bir bola” siyosati amal qilgan. Ayniqsa, qishloq joylarda ikki farzandli oilalar ijtimoiy imtiyozlardan mahrum bo‘lgan.
Hozir esa hukumat ko‘p farzandli oilalarni qo‘llab-quvvatlashga katta e’tibor qaratmoqda. Ushbu chora-tadbirlar demografik inqirozni oldini olish va mamlakatning kelajakdagi mehnat resurslarini ta’minlashga qaratilgan.
Bu esa Xitoy iqtisodiyoti va jamiyatining barqaror rivojlanishiga xizmat qiladi.
