Turkiyada umr ko‘rish davomiyligi oshmoqda. Bu haqida Zamin.uz xabar berdi.
Turkiya statistika instituti tomonidan 2022–2024 yillarga oid “Hayot jadvallari” hisobotida mamlakatda tug‘ilgan chaqaloq uchun kutilayotgan o‘rtacha umr 78,1 yil deb ko‘rsatildi. Bu ko‘rsatkich oldingi yillarga nisbatan oshgan.
Ayollar uchun umr ko‘rish davomiyligi 80,7 yilni tashkil etsa, erkaklar uchun bu ko‘rsatkich 75,5 yilni tashkil qiladi. Demak, ayollar erkaklarga nisbatan o‘rtacha 5,2 yil ko‘proq umr ko‘rmoqda.
Hisobotda ta’lim darajasi bilan umr davomiyligi o‘rtasida ham bog‘liqlik mavjudligi ta’kidlangan. Oliy ma’lumotga ega 30 yoshli shaxslar o‘rta ma’lumotlilarga qaraganda taxminan 5 yil ko‘proq yashashi mumkin.
Sog‘lom umr ko‘rish davomiyligi o‘rtacha 57,6 yilga teng. Qiziq tomoni shundaki, bu ko‘rsatkichda erkaklar (58,9 yil) ayollardan (56,3 yil) biroz oldinda.
Bundan tashqari, 65 yoshga yetgan insonlar uchun o‘rtacha yana 18 yil umr davom etishi taxmin qilinmoqda. Turkiyada sog‘liqni saqlash tizimidagi islohotlar, tibbiy xizmat sifatining yaxshilanishi hamda jismoniy faollikni oshirishga qaratilgan chora-tadbirlar umr davomiyligining oshishiga ijobiy ta’sir ko‘rsatmoqda.
Bu tendensiya mamlakat aholisi salomatligi va hayot sifatining yaxshilanishidan dalolat beradi.
