Avstriyada bankomat portlatgan guruh qo‘lga olindi
Avstriyaning jinoyat ishlari bo‘yicha maxsus politsiyasi mamlakat hududida bankomatlarni portlatish orqali yirik talonchiliklarda gumon qilingan jinoyatchilar guruhiga qarshi keng qamrovli operatsiya o‘tkazdi. Bu haqida Zamin.uz xabar berdi.
Rasmiy ma’lumotlarga ko‘ra, joriy yil boshidan beri faoliyat yuritgan ushbu jinoiy tuzilmaga aloqador 14 nafar shaxs ushlangan. Qo‘lga olinganlar asosan Marokashdan kelgan, ammo Niderlandiya fuqaroligiga ega bo‘lgan shaxslar ekani ma’lum qilindi.
Avstriya rasmiylarining bayonotida aytilishicha, 2025 yil boshidan buyon mamlakatda jami 26 ta bankomat bomba yordamida portlatilgan. Bu jinoyatlar ko‘pincha tungi vaqtlarda, odamlar kam harakatlanadigan paytlarda sodir etilgan.
Avstriya va Niderlandiya politsiyalari ikki mamlakatda jami 12 ta joyda maxsus tintuv ishlarini amalga oshirdi. Reydlar natijasida katta miqdorda jinoyatga aloqador dalillar topildi.
Xususan, 16 ta skuter, 50 dan ortiq mobil aloqa qurilmalari, taxminan 400-500 gramm portlovchi kimyoviy moddalar, turli giyohvand vositalar va 39 ming yevro naqd pul musodara qilindi. Jinoyatchilarning harakat uslubi bir xilda: odatda, tunda soxta davlat raqamli yoki o‘g‘irlangan avtomobilda kelib, bankomatni portlatib, ichki mexanizmni yo‘q qiladilar va pul qutilarini olib qochadilar.
Bunday jinoyatlar nafaqat Avstriyada, balki Germaniyada ham ko‘paymoqda. Statistik ma’lumotlarga ko‘ra, Germaniyada 2022 yilda 442 ta, 2023 yilda esa 367 ta bankomat shunday usulda portlatilgan.
Bu holatlar ortidan Germaniya Ichki ishlar vazirligi 2023 yilda bankomatlarga portlovchi moddalar qo‘llash orqali amalga oshiriladigan o‘g‘irliklarga qarshi javobgarlikni kuchaytirish bo‘yicha chora-tadbirlarni ilgari surdi. Hozirda Avstriyada ushbu jinoyat ishi bo‘yicha umumiy 33 nafar shaxsga nisbatan tergov ishlari davom etmoqda.
Huquqni muhofaza qiluvchi organlar surishtiruv ishlarini davom ettirmoqda va ehtimol, qo‘shimcha gumondorlar ham ushlanishi mumkinligi aytilmoqda. Shu tahdidli holatlar fonida Yevropaning bir qancha mamlakatlarida bankomat xavfsizligini ta’minlash uchun yangi texnologiyalar joriy etish masalasi ham muhokama qilinmoqda.
Ekspertlar bunday jinoyatlarning oldini olish uchun davlatlararo hamkorlikni yanada kuchaytirish zarurligini ta’kidlamoqda.
