Tramp va Putin sammitidan hech qanday kelishuv chiqmadi
AQSH va Rossiya prezidentlari Donald Tramp hamda Vladimir Putin o‘rtasidagi sammit natijalari bo‘yicha hech qanday yirik yutuq yoki kelishuvga erishilmagani haqida Ukraina prezidenti Vladimir Zelenskiy atrofidagilar fikr bildirmoqda. Bu haqida Zamin.uz xabar berdi.
Financial Times nashri muxbiri Kristofer Miller Ukraina rahbariga yaqin manbalarga tayanib, bu ma’lumotni taqdim etdi. Ukraina prezidentining ismi oshkor etilmagan yordamchisi Amerikaning hozircha Zelenskiy bilan bog‘lanmaganini aytgan va vaziyatni juda g‘alati deb baholagan.
Shuningdek, Ukraina yetakchisiga yaqin boshqa manba Alyaskada bo‘lib o‘tgan uchrashuvni ahamiyatsiz deb atadi. Boshqa tomondan, Donald Tramp o‘zining matbuot anjumanida yaqinda Zelenskiyga qo‘ng‘iroq qilib, sammit natijalarini yetkazishini ma’lum qildi.
U NATO vakillari bilan ham aloqaga chiqishini aytib, yaqin va munosib deb topgan shaxslarga qo‘ng‘iroq qilishini bildirdi. Trampning ta’kidlashicha, u prezident Zelenskiyga bugungi uchrashuv haqida to‘liq ma’lumot berishga tayyor.
Ma’lumot o‘rnida, Tramp va Putin 15 avgust kuni Alyaska shtatining Ankorij shahrida joylashgan harbiy baza hududida uchrashdilar. Uchrashuv oxirida hech qanday rasmiy kelishuvga erishilmadi.
Prezidentlar matbuot oldida qisqacha bayonot berishdi, ammo keyinchalik jurnalistlarning savollariga javob bermay zalni tark etdilar. Bu sammit ikki tomon o‘rtasidagi munosabatlarda sezilarli o‘zgarishlarga olib kelmadi.
