Ispaniyada issiqdan 20 ta yirik o‘rmon yong‘ini yuz berdi
Ispaniyada kuchli issiq ob-havo sababli 20 ta yirik o‘rmon yong‘ini yuzaga kelmoqda. Bu haqida Zamin.uz xabar berdi.
Yong‘inlarni o‘chirish ishlari murakkablashganidan so‘ng, hukumat qo‘shimcha 500 nafar harbiy xizmatchini safarbar etdi. Galisiya mintaqasida bir nechta yong‘in birlashib, katta maydonni qamrab olgan yong‘inga aylangan.
Bu vaziyat tufayli ayrim avtomobil yo‘llari va temir yo‘l qatnovi vaqtincha to‘xtatildi. So‘nggi bir hafta ichida yong‘inlar uch kishining hayotiga zomin bo‘ldi va 115 ming gektardan ortiq hududni vayron qildi.
Shuningdek, Portugaliyada ham o‘rmon yong‘inlari keng tarqalib, katta zarar yetkazmoqda. Mutaxassislarning ma’lumotiga ko‘ra, ayrim hududlarda havo harorati 45 darajagacha ko‘tarilishi mumkin.
Ispaniya bosh vaziri Pedro Sanches vaziyatning jiddiyligini ta’kidlab, qo‘shimcha harbiy kuchlar yuborilishini ma’lum qildi. Rasmiylar seshanbadan boshlab havo biroz salqinlashishini kutmoqda.
Hozircha esa yuqori harorat va quruq ob-havo yong‘inlarga qarshi kurashni murakkablashtirmoqda.
