ChatGPT noto‘g‘ri javobidan sayohat muvaffaqiyatsiz tugadi
Ispaniyalik bloger Meri Kaldas va uning turmush o‘rtog‘i Aleksandro Sid rejalashtirgan ta’tilga bora olishmadi. Bu haqida Zamin.uz xabar berdi.
Bu holat ular ishonib murojaat qilgan sun’iy intellekt — ChatGPTning noto‘g‘ri javobi sabab yuzaga keldi. Juftlik AQShga qarashli Puerto-Riko oroliga sayohat qilishni niyat qilgan edi.
Parvoz, mehmonxona va tadbirlar uchun bron qilishdan oldin ular neyron tarmoqdan qo‘shimcha hujjatlar kerak yoki yo‘qligini so‘rashdi. ChatGPT ularga viza talab etilmasligini aytdi, ammo AQSh va uning hududlariga kirish uchun zarur bo‘lgan ESTA ruxsatnomasi haqida ma’lumot bermadi.
Sayohatchilar bu haqda faqat aeroportda ro‘yxatdan o‘tish vaqtida bilib qoldi. Xodimlar ularning ESTA hujjati yo‘qligi sababli parvozga ruxsat bermadi.
Meri o‘z blogida “Har doim ko‘p tadqiqot qilaman, lekin bu safar ChatGPTdan so‘radim va u yo‘q dedi” deb yozdi. Ushbu noxush voqea haqida bloger joylagan video tez tarqaldi.
Foydalanuvchilar fikri ikki qarama-qarshi tomonga bo‘lingan: ayrimlar juftlikka achinishdi, boshqalar esa ularning sayohatni tashkil etishdagi mas’uliyatsizligini tanqid qildi. Kaldas hazil aralash, chat-bot ehtimol “xafalikdan qasd olgani”ni ham aytdi: “Ba’zan uni haqorat qilaman, hech keragi yo‘q deyman.
Lekin yaxshi ma’lumot ber deb so‘rayman... balki shuning uchun u bizdan qasd olgandir”.
Bu voqea sun’iy intellektdan foydalanishda ehtiyotkorlik va qo‘shimcha manbalardan tekshirish zarurligini yana bir bor ko‘rsatdi.
