Isroil G‘azoga keng ko‘lamli hujum boshlaydi
Isroil armiyasi G‘azo shahriga keng ko‘lamli hujumga tayyorgarlik ko‘rmoqda. Bu haqida Zamin.uz xabar berdi.
Rejaga muvofiq, sentabr oyida 60 ming nafar zahiradagi harbiy chaqiriladi. Asosiy jangovar harakatlarni muntazam qo‘shinlar amalga oshiradi.
Hujum rejasi mudofaa vaziri tomonidan tasdiqlangan va hozirda G‘azoning ayrim hududlarida amaliyotlar davom etmoqda. Isroilning bu qarori xalqaro maydonda keskin tanqidga uchramoqda.
Fransiya prezidenti Emmanuel Makron buni ikki xalq uchun halokatli voqea deb atadi. Shuningdek, xalqaro tashkilotlar ham hujum rejasini xavfli deb baholamoqda.
Birlashgan Millatlar Tashkiloti va boshqa gumanitar tashkilotlar odamlarni majburan janubga ko‘chirish xalqaro huquq normalarini buzishi mumkinligini bildirgan. Janubiy hududlar allaqachon gavjum va aholi oziq-ovqat hamda yashash sharoitlarida qiyinchiliklarga duch kelmoqda.
Isroil hukumati asosiy maqsad sifatida Hamasni mag‘lub etish va garovdagilarni ozod qilishni ko‘rsatmoqda. Biroq sulh bo‘yicha hech qanday kelishuvga erishilmagani sababli vaziyatning yanada keskinlashishi ehtimoli katta.
Bu holat mintaqada xavfsizlik va barqarorlikka tahdid solmoqda.
