Jirafalar to‘rtta mustaqil turga ajratildi
Ko‘p yillar davomida biologiya sohasidagi mutaxassislar jirafalarni bir turga mansub deb hisoblab, ularni to‘qqizta kichik guruhga ajratib kelishgan. Bu haqida Zamin.uz xabar berdi.
Ularning fikricha, jirafalar o‘rtasida katta farq yo‘q bo‘lib, ular tur doirasida turli hududlarga moslashgan. Biroq so‘nggi ilmiy tadqiqotlar, xususan genetik tahlillar va bosh suyagi tuzilishini chuqur o‘rganish natijalari bu qarashlarni o‘zgartirdi.
Ilmiy izlanishlar shuni ko‘rsatdiki, jirafalar o‘rtasidagi farqlar shunchalik katta bo‘ldiki, ularni bir tur emas, balki alohida to‘rtta mustaqil tur sifatida tasniflash zarur. Oxirgi o‘n yil ichida Afrikaning turli hududlaridan, xususan Niger cho‘llaridan Janubiy Sudan savannalarigacha bo‘lgan hududlardan yig‘ilgan namunalar tahlil qilindi.
Ushbu tadqiqotlar natijasida ilmiy jamoatchilik yangi xulosaga keldi: jirafalar aslida to‘rtta mustaqil turga bo‘linadi. Endilikda ular quyidagicha ajratiladi: Masai jirafasi, asosan Tanzaniya, Keniya va Ugandada tarqalgan; Shimoliy jirafa, Janubiy Sudandan Efiopiyagacha uchraydi va uchta kichik turga bo‘linadi; To‘rsimon jirafa, Keniya, Efiopiya va Somali savannalarida yashaydi; Janubiy jirafa esa Namibiya, Janubiy Afrika, Botsvana va qo‘shni davlatlarda keng tarqalgan.
Ushbu yangi tasnif jirafalar haqidagi bilimlarimizni yanada boyitdi va ularni himoya qilishda muhim ahamiyatga ega bo‘ladi.
