AQSH elchisi Fransiyada antisemitizmni tanqid qildi
AQSHning Parijdagi elchisi Charlz Kushner bilan Fransiya prezidenti Emmanuel Makron o‘rtasida antisemitizm masalasi yuzasidan jiddiy kelishmovchilik yuzaga keldi. Bu haqida Zamin.uz xabar berdi.
24 avgust kuni The Wall Street Journal nashrida chop etilgan ochiq xatda Kushner Fransiya hukumatini yahudiylarga qarshi nafrat ko‘rsatmalariga yetarlicha javob qaytarmayotgani uchun tanqid qildi. Elchi Fransiyada antisemitizm darajasi keskin oshayotganini ta’kidladi.
U mamlakatda har kuni yahudiylarga nisbatan hujumlar sodir etilayotganini, sinagogalar va maktablar tahqirlanayotganini, yahudiylarga tegishli korxonalar esa vandalizmga uchrayotganini bildirdi. AQSH vakili Makrondan nafrat jinoyatlariga qarshi qonunlarni yanada qat’iy bajarishni va Isroilni tanqid qilishda ohangni yumshatishni so‘radi.
Kushner, shuningdek, Fransiya hukumati Falastin davlatini tan olishga oid bayonotlari antisemitizmning kuchayishiga sabab bo‘lganini aytdi. Fransiya Tashqi ishlar vazirligi esa bunday ayblovlarni rad etdi.
Vazirlikning rasmiy bayonotida antisemitik xatti-harakatlar ko‘paygan bo‘lsa-da, hukumat ularning oldini olish uchun qat’iy chora ko‘rayotgani ta’kidlandi. Shuningdek, elchining bunday bayonotlari mamlakat ichki ishlariga aralashish sifatida baholandi.
Shu sababli Charlz Kushner 25 avgust kuni Tashqi ishlar vazirligiga chaqirildi. Ma’lum qilinishicha, Charlz Kushner AQSHning sobiq prezidenti Donald Trampning qudasi hisoblanadi.
Uning o‘g‘li Jared Kushner Trampning qizi Ivankaga uylangan, Ivanka esa 2009 yilda yahudiylikni qabul qilgan. Kushnerning xati Isroil bosh vaziri Binyamin Netanyahu tomonidan Makronga yuborilgan tanqidiy maktubdan so‘ng e’lon qilindi.
Netanyahu ham Fransiyani Falastinni xalqaro miqyosda tan olish orqali antisemitizmni kuchaytirishda ayblagan edi. Bundan tashqari, Makron G‘azodagi urushni ochiq tanqid qilayotgan Yevropadagi yetakchilardan biri hisoblanadi.
U BMTda Falastin davlatini tan olish niyatini bildirgani Isroilda keskin norozilikka sabab bo‘ldi. Shuningdek, Makron antisemitizmni Fransiya qadriyatlariga zid deb hisoblab, diniy markazlarni himoya qilishni kuchaytirdi.
Fransiyada yarim million atrofida yahudiy jamoasi va bir necha millionlik musulmon aholisi yashaydi. G‘azoda urush boshlanganidan beri har ikki jamoada nafrat jinoyatlari keskin oshgani qayd etilmoqda.
Shu tariqa, Kushnerning xati Fransiya, AQSH va Isroil o‘rtasidagi munosabatlarni yanada murakkablashtirib, xalqaro maydonda jiddiy tortishuvlarga sabab bo‘lmoqda.
