Xitoy TCP 443 portini to‘liq blokladi
Xitoyning internet siyosatlari jahon hamjamiyatining diqqat markazida bo‘lib qolmoqda. Bu haqida Zamin.uz xabar berdi.
Ma’lum bo‘lishicha, “Xitoyning buyuk xavfsizlik devori” deb ataluvchi mashhur senzura tizimi mamlakatdagi internet trafigi uchun muhim hisoblangan TCP 443 portini to‘liq to‘sib qo‘ydi. Ushbu port orqali ko‘plab xalqaro veb-saytlar, ijtimoiy tarmoqlar va onlayn xizmatlar ishlagan.
Natijada, Xitoyning internet qismi global tarmoqdan deyarli to‘liq ajralib qoldi. Endilikda mamlakatda faqat mahalliy platformalar va hukumat tomonidan tasdiqlangan xizmatlar faoliyat yuritishi mumkin.
Bu holat qit’a miqyosida real izolyatsiya sifatida baholanmoqda. Ekspertlarning fikricha, Xitoyning internetni cheklash siyosati “tanlab o‘chirish” strategiyasiga asoslangan.
Ya’ni, butunlay bloklash o‘rniga, faqat xorijiy resurslarga yo‘naltirilgan qism to‘siladi. Shu sababli mamlakat ichidagi raqamli xizmatlar to‘liq ishlashda davom etadi va fuqarolar hukumat nazoratidagi milliy tarmoqdan foydalanishga majbur bo‘ladi.
Ba’zi kuzatuvchilar bu jarayonni “yangi raqamli temir parda” deb atamoqda. Chunki Pekin tashqi axborot oqimini qat’iy nazorat qilib, global internetdan o‘z segmentini asta-sekin uzib bormoqda.
Bu esa Xitoyning axborot maydonidagi mustaqilligini oshirishga qaratilgan siyosat sifatida qaralmoqda.
