Eron rasmiysi Rossiyaning Isroilga yordam berganini aytdi
Eronning siyosiy maqsadga muvofiqlikni aniqlash kengashi a’zosi Said Muhammad Sadrning so‘nggi bayonoti mintaqaviy va xalqaro siyosat maydonida keng muhokamalarga sabab bo‘ldi. Bu haqida Zamin.uz xabar berdi.
U iyun oyida Eron va Isroil o‘rtasida yuz bergan 12 kunlik to‘qnashuv davomida Rossiyaning Isroilga Eronning havo hujumidan mudofaa tizimlari joylashuvi haqida razvedka ma’lumotlarini berganini ma’lum qildi. Bu haqda Sadr Synergyir telekanaliga bergan intervyusida ochiq gapirdi, deb xabar beradi «Kommersant» nashri.
Sadrning fikricha, bu voqea Rossiya bilan strategik ittifoq haqidagi tasavvurlarni asossiz qildi. U Moskva faqat og‘zaki ravishda Isroilning Eronga qarshi harakatlarini ma’qullamasligini bildirganini, ammo amaliyotda unga yordam ko‘rsatganini ta’kidladi.
Bu esa ikki davlat o‘rtasidagi sheriklik haqidagi fikrlarni shubha ostiga qo‘ydi. Eronlik rasmiy Moskva va boshqa davlatlar o‘rtasidagi aloqalarga ham misollar keltirdi.
Masalan, Turkiya NATO a’zosi bo‘lishiga qaramay, Rossiya unga S-400 mudofaa tizimini sotishga rozilik bergan. Bu esa ittifoqchilikdan ko‘ra, iqtisodiy manfaatlarga asoslangan hamkorlik ekanligini ko‘rsatadi.
Shu bilan birga, Sadr Moskva va Tehron o‘rtasidagi aloqalarni butunlay uzish tarafdori emasligini bildirdi. Uning so‘zlariga ko‘ra, ikki davlat munosabatlari saqlanib qolishi zarur, ammo Rossiyaga to‘liq ishonish mumkin emas.
U real vaziyatni anglash va Rossiyani mutlaq ishonchli hamkor sifatida ko‘rmaslik lozimligini ta’kidladi. Natijada Said Muhammad Sadrning bayonoti Rossiya va Eron munosabatlari borasida yangi savollarni yuzaga keltirdi.
Mutaxassislar fikricha, bu gaplar ikki davlat o‘rtasidagi strategik aloqalarga ta’sir qilishi va mintaqaviy siyosatda yangi o‘zgarishlarga sabab bo‘lishi mumkin. Ekspertlar va kuzatuvchilar Moskva va Tehron munosabatlaridagi ziddiyatning kelajak oqibatlarini diqqat bilan kuzatmoqda.
