Fransiya politsiyasi Eyfel minorasi va sinagogalarga qarshi terror hujumini rejalashtirgan 15 va 17 yoshli ikki o‘smirni hibsga oldi. Bu haqida Zamin.uz xabar berdi.
Ushbu holat haqida Le Figaro nashri xabar berdi. Ma’lumotlarga ko‘ra, o‘smirlar Parij yaqinida tug‘ilgan va arab-musulmon oilalarida ulg‘aygan.
Ular ISHID guruhining g‘oyalariga hamdardlik bildirib, zo‘ravonlikka oid kontentlarni muntazam almashib kelgan. Shuningdek, xorijga jihod uchun ketish haqida suhbatlashganlari aniqlangan.
Yaqinda esa Fransiya hududida hujumlar uyushtirish niyatida ekanliklarini bildirganlar. Ayniqsa, Isroilning G‘azodagi harbiy operatsiyalari munosabati bilan Eyfel minorasi va sinagogalarga e’tibor qaratishgan.
Nashr ma’lumotlariga ko‘ra, ular aniq hujum joyini belgilamagan bo‘lsa-da, qorong‘u internet tarmoqlari orqali qurol izlashni boshlagan. 1 avgust kuni o‘smirlar terrorchilik maqsadida jinoiy til biriktirish aybi bilan sudga taqdim etildi.
Le Figaro yozishicha, Fransiyada voyaga yetmaganlar orasida terrorizmga moyillik ortib borayotgani jiddiy xavotir uyg‘otmoqda. 2022 yilda ushbu jinoyat bo‘yicha faqat ikki bola ushlangan bo‘lsa, 2023 yilda ularning soni 15, 2024 yilda esa 18 nafarga yetgan.
2025 yil boshidan beri yana 13 nafar voyaga yetmagan shaxs hibsga olingan. Yevropol hisobotida ko‘rsatilishicha, Yevropa Ittifoqida terrorchilikda gumon qilinganlarning uchdan bir qismi 20 yoshdan kichik.
Shu bois Fransiya milliy aksilterror prokuraturasi 2023 yil may oyida aynan voyaga yetmaganlar bilan ishlash uchun alohida bo‘lim tashkil etdi. Bu chora yoshlar orasida terrorizmga qarshi kurashni kuchaytirishga qaratilgan.
