Kim Chen In Pekinda harbiy paradga qatnashadi
Shimoliy Koreya rahbari Kim Chen In kelasi hafta Pekinda bo‘lib o‘tadigan yirik harbiy paradga Rossiya prezidenti Vladimir Putin bilan birga tashrif buyuradi. Bu haqida Zamin.uz xabar berdi.
Bu Kim Chen Inning birinchi xalqaro ko‘p tomonlama uchrashuvi bo‘lib, Xitoy rahbari Si Szinpin uchun muhim diplomatik yutuq hisoblanadi. Paradda Ikkinchi jahon urushining tugaganiga 80 yil to‘lishi nishonlanadi.
Xitoy yuzlab samolyotlar, tanklar hamda yangi harbiy texnologiyalarni namoyish etadi. Tadbir tarixiy Tyananmen maydonida o‘tkazilib, unda o‘n minglab askarlar ishtirok etadi.
Rossiya va Shimoliy Koreya rahbarlari bilan birga yana 26 mamlakat yetakchilari ham paradga kelishi rejalashtirilgan. Bu Shimoliy Koreya rahbarining Xitoyda o‘tkaziladigan paradga 1959 yildan buyon birinchi bor qatnashishi bo‘ladi.
G‘arb davlatlari esa paradga qatnashmaydi, chunki ular Rossiyaning Ukrainadagi harbiy harakatlarini qoralashda davom etmoqda. Shuningdek, Kim Chen Inning Rossiyaga qurol va harbiy yordam yuborgani G‘arb davlatlarida keskin tanqid qilinmoqda.
Mutaxassislarning fikricha, ushbu uchrashuv Si Szinpin uchun xalqaro siyosatda qo‘shimcha kuch beradi. Kim Chen In esa Xitoy va Rossiya o‘rtasidagi muvozanatni saqlashga intilmoqda.
Shu bilan birga, AQSh prezidenti Donald Trampning Osiyoga tashrifi ehtimoli ham muhokama qilinmoqda.
