Zelenskiy va Putin Jenevada muzokara o‘tkazishi mumkin
Germaniya kansleri Fridrix Mersning ta’kidlashicha, Ukraina prezidenti Volodimir Zelenskiy va Rossiya rahbari Vladimir Putin o‘rtasidagi to‘g‘ridan to‘g‘ri muzokaralar Shveysariyaning Jeneva shahrida o‘tkazilishi mumkin. Bu haqida Zamin.uz xabar berdi.
Bu haqda u 2 sentyabr kuni Berlinda Shveysariya prezidenti Karin Keller-Zutter bilan birgalikda o‘tkazilgan matbuot anjumanida ma’lum qildi. Mersning fikricha, Jeneva urushni to‘xtatish va tinchlik kelishuviga erishish uchun eng munosib joy hisoblanadi.
Shuningdek, Germaniya kansleri 4 sentyabrda Parijda gibrid formatda o‘tkazilishi rejalashtirilgan Ukraina bo‘yicha “ko‘ngillilar koalitsiyasi” yig‘ilishida ham bu taklifni yanada aniqroq bayon etishini bildirgan. Oldinroq Fransiya prezidenti Emmanuel Makron ham Putin va Zelenskiy o‘rtasidagi uchrashuv Jenevada o‘tkazilishi tarafdori ekanligini aytgan edi.
Shveysariya prezidenti Karin Keller-Zutter o‘z nutqida hukumatining Jeneva shahrida bunday uchrashuvni tashkil etishga tayyorligini ta’kidladi. Unga ko‘ra, xalqaro tashkilotlarning ko‘plab markaziy idoralari aynan Jenevada joylashgani tufayli bu shahar tinchlik muzokaralari uchun ideal joy hisoblanadi.
Shveysariya rahbari taraflarning bir-birini tinglashga va kamida oldinga qadam qo‘yishga tayyor bo‘lishi muhimligini ta’kidladi. Urushni to‘xtatish uchun bevosita muloqot boshlanishi zarur, ammo bu barcha tomonlarning muzokara stoliga o‘tirishga rozilik berishiga bog‘liq.
Jenevada yuqori darajadagi sammit tashkil etilishi Ukraina va Rossiya o‘rtasidagi urushni to‘xtatish yo‘lida yangi imkoniyatlar ochishi mumkinligi haqida fikrlar mavjud. Ushbu tashabbus tinchlik jarayonini ilgari surishda muhim ahamiyat kasb etadi.
