Lego "O‘lim yulduzi" eng qimmat to‘plamni chiqardi
Lego kompaniyasi yana bir bor tarixda o‘z o‘rnini mustahkamladi. Bu haqida Zamin.uz xabar berdi.
Meduza nashrining ma’lumotiga ko‘ra, mashhur daniyalik kompaniya Star Wars ("Yulduzli urushlar") filmiga asoslangan eng yirik va qimmat konstruktor to‘plamini taqdim etdi. Yangi to‘plam "O‘lim yulduzi" nomi bilan tanilgan bo‘lib, uning narxi 999,99 dollar, ya’ni taxminan 12,5 million so‘m atrofida belgilangan.
Bu LEGO tarixidagi eng qimmat to‘plamlardan biri hisoblanadi. Mazkur konstruktor to‘plami 9000 dan ortiq detalga ega bo‘lib, uning balandligi 70 santimetr, kengligi esa 80 santimetrni tashkil etadi.
Komplektda 38 ta personaj figurasi mavjud bo‘lib, ular orasida Lyuk Skayuoker, Xan Solo, Malika Leya va Imperator Palpatin kabi mashhur qahramonlar bor. To‘plam bir necha sektorlarga bo‘lingan va har bir sektor "Yulduzli urushlar" filmidagi muhim sahnalarni qayta yaratishga imkon beradi.
Jumladan, Malika Leyaning qamoqxonasi, Imperator Palpatinning taxt zali va angar boshqaruv markazi kabi joylar mavjud. Ushbu konstruktor nafaqat bolalar, balki Star Wars franshizasining barcha yoshdagi muxlislari uchun mo‘ljallangan.
Kollektorlik mahsuloti sifatida keng qiziqish uyg‘otmoqda va taqdimotdan oldin ijtimoiy tarmoqlarda faol muhokamalarga sabab bo‘ldi. Rasmiy savdolar 2025 yil 4 oktyabrda boshlanadi.
LEGO kompaniyasi mahsulotga katta talab bo‘lishini kutmoqda, ayrim fanatlar esa allaqachon to‘plamni oldindan buyurtma qilishga harakat qilmoqda. Eslatib o‘tamiz, bugunga qadar eng qimmat LEGO to‘plami ham "Yulduzli urushlar" mavzusida bo‘lib, 2017 yilda chiqarilgan "Millennium Falcon" modeli edi.
U 7400 detalga ega bo‘lib, hozirgi narxi taxminan 850 dollar yoki 10,6 million so‘m atrofida baholanmoqda. Yangi "O‘lim yulduzi" to‘plami esa shu rekordni yangilashga tayyorlanmoqda.
