Turkiyada axborot vositalari va ijtimoiy tarmoqlar faoliyatiga yangi cheklovlar joriy etildi. Bu haqida Zamin.uz xabar berdi.
Xorijiy ommaviy axborot vositalari ma’lumotlariga ko‘ra, Istanbul shahrida mitinglar o‘tayotgan paytda mashhur onlayn platformalarga kirishda katta muammolar yuzaga keldi. 7 sentyabr kuni soat 20:45 atrofida X (sobiq Twitter), YouTube, Instagram, Facebook, TikTok va WhatsApp kabi ijtimoiy tarmoqlar va messenjerlarga ulanishda uzilishlar boshlandi.
Foydalanuvchilar ushbu xizmatlardan foydalanishda cheklovlar mavjudligini va ularning sekin ishlayotganini bildirgan. Ekspertlar fikricha, bu cheklovlar Turkiya Internet provayderlari ittifoqi tomonidan amalga oshirilgan bo‘lishi mumkin, ammo hozircha tashkilotdan rasmiy izoh berilmagan.
Mahalliy jurnalistlar ma’lumotlariga ko‘ra, ijtimoiy tarmoqlarga kirishning cheklanishi siyosiy voqealar bilan bog‘liq. Aniqlanishicha, cheklovlar Respublika Xalq partiyasining Istanbuldagi bosh qarorgohi oldida politsiya tomonidan barrikadalar o‘rnatilganidan keyin joriy qilingan.
Shu sababli partiya faollari va tarafdorlari aholini ommaviy mitinglarga chaqirgan. Natijada, ijtimoiy tarmoqlar orqali tarqatilayotgan chaqiriqlar va videoyozuvlarning tez tarqalishini oldini olish maqsadida onlayn platformalarning ishlashi cheklangan.
Bu holat jamoat tartibini saqlash va siyosiy vaziyatni nazorat qilish uchun qilingan choralar sifatida baholanmoqda.
