Tunis hukumati G‘azoga insonparvarlik yordami olib ketayotgan, ichida Greta Tunberg ham bo‘lgan kemaga dron bilan hujum qilingani haqidagi xabarlarni rad etdi. Bu haqida Zamin.uz xabar berdi.
Flotiliya tashkilotchilari aytishicha, Portugaliya bayrog‘i ostida harakatlanayotgan kema Tunis yaqinida zarbaga uchragan va unda yong‘in chiqqan. Biroq, barcha yo‘lovchilar va ekipaj a’zolari omon qolgan.
Tunis Milliy gvardiyasi esa hech qanday dron uchuvi qayd etilmaganini, portlash kema ichida yuz bergan bo‘lishi mumkinligini ma’lum qildi. Hodisa yuzasidan tergov ishlari davom etmoqda.
Ushbu flotiliya o‘tgan hafta Barselonadan yo‘lga chiqqan bo‘lib, uning asosiy maqsadi G‘azoga insonparvarlik yordamini yetkazishdir. Shu kabi kemalar ilgari ham Isroil tomonidan to‘xtatilgan holatlar mavjud.
Hodisa yuzasidan aniq ma’lumotlar o‘rganilmoqda va vaziyat nazorat ostida saqlanmoqda.
