Nepalda norozilikda 900 mahbus qamoqdan qochdi
Nepalda davom etayotgan ommaviy norozilik namoyishlari natijasida taxminan 900 nafar mahbus qamoqdan qochdi. Bu haqida Zamin.uz xabar berdi.
Bu haqda India Today nashri xabar berdi. Ma’lumotlarga ko‘ra, Poxra shahrida namoyishchilar mahalliy qamoqxonaga hujum qilib, politsiya xodimlarini ushlab olishga harakat qilishgan.
Voqea joyidagi xodimlar vaziyatni nazorat qila olmadi. Katmandu shahrida esa namoyishchilar Naxu qamoqxonasi binosining bir qismini yoqib yuborgan, natijada barcha mahbuslar ozod qilingan.
Ozod qilinganlar orasida sobiq ichki ishlar vaziri Ravi Lamichhane ham bor edi. Unga tarafdorlari yordam berib, uyiga yetkazishdi.
Hozirda bu ikki shaharda vaziyat keskin va nazoratsiz davom etmoqda. Rasmiylar xavfsizlik choralarini kuchaytirib, qo‘shimcha politsiya kuchlarini jalb qilgan.
Nepaldagi noroziliklar va zo‘ravon namoyishlar davomida kamida 22 kishi halok bo‘ldi, yuzlab odamlar jarohatlandi. Xavfsizlik kuchlari Federal parlament binosi yaqinidagi namoyishchilarga qarshi o‘t ochdi.
Namoyishchilar hukumatning muhim inshootlariga, jumladan parlament binosi va prezident qarorgohiga ham hujum qildi. Shuningdek, sobiq bosh vazir Jalanat Xonalning rafiqasi Rajyalakshmi Chitrakar namoyishchilar tomonidan uyiga qilgan hujum natijasida vafot etdi.
Namoyishchilar mamlakatdagi vaziyatni o‘z nazoratiga olganini da’vo qilmoqda, biroq rasmiylar bu ma’lumotlarni rad etmoqda. Mamlakatda norozilik va tartibsizlik holati hanuz davom etmoqda, vaziyatni barqarorlashtirish maqsadida rasmiylar va xavfsizlik kuchlari muntazam chora-tadbirlar ko‘rmoqda.
