Xunanlik bola ortiqcha uy vazifasidan kasallandi
Xitoyning Xunan viloyatida 11 yoshli maktab o‘quvchisi ortiqcha uy vazifalari bajarish natijasida sog‘lig‘iga jiddiy zarar yetkazdi. Bu haqida Zamin.uz xabar berdi.
Mahalliy ommaviy axborot vositalari xabariga ko‘ra, 26 avgust kuni Lyan Lyan ismli bola soat 08:00 dan kechki 22:00 gacha uzluksiz dars tayyorlash bilan band bo‘lgan. U bir kunda barcha yozgi vazifalarini tugatishga harakat qilgan.
Bir necha soat o‘tib, unda bosh aylanishi, qo‘l va oyoqlarda zaiflik, bosh og‘rig‘i va nafas qisishi kabi alomatlar paydo bo‘lgan. Ota-onasi uni darhol shifokorga olib borgan.
Mutaxassislar bola tanasida giperventilyatsiya sindromi aniqlanganini ma’lum qilgan. Ushbu holat doimiy fikriy va hissiy zo‘riqish natijasida yuzaga kelgan.
Bolaga maxsus nafas olish niqobi taqilib, qisqa vaqt ichida ahvoli yaxshilangan. Shifokorlar ota-onalar tomonidan berilayotgan bosim, imtihon oldi xavotirlari hamda uzoq vaqt gadjetlardan foydalanish bunday holatlarning asosiy sabablari ekanligini ta’kidlamoqda.
Giperventilyatsiya sindromi nafas olishda qiyinchilik, mushaklarning tortishi, yurak urishining tezlashishi kabi belgilarga olib kelishi mumkin va hatto hayot uchun xavfli bo‘lishi ehtimoldan holi emas. Xunan viloyatida avgust oyida shunga o‘xshash alomatlar bilan tez tibbiy yordamga 30 dan ortiq bola murojaat qilgani qayd etilgan.
Bu ko‘rsatkich oldingi oylar bilan solishtirganda o‘n barobar ko‘pdir. Shu sababli ota-onalar va maktablar bolalarning sog‘lig‘iga alohida e’tibor qaratishi zarur.
Bolalarga ortiqcha yuklamalar berish o‘rniga ularning dam olish va sog‘lom rivojlanishi ta’minlanishi lozim.
