FQB Charli Kirk qotilini topishga mukofot berdi

Federal qidiruv byurosi Charli Kirkni o‘ldirish bilan bog‘liq jinoyat bo‘yicha qo‘shimcha choralar ko‘rmoqda. Bu haqida Zamin.uz xabar berdi.

Maxsus xizmatlar qotil haqida ishonchli ma’lumot bergan shaxslarga 100 ming dollar mukofot berilishini e’lon qildi. Byuro o‘zining rasmiy ijtimoiy tarmoq sahifasida gumonlanuvchining suratini joylashtirdi va fuqarolardan uni tanib, huquqni muhofaza qiluvchi organlarga xabar berishni so‘radi.

Associated Press agentligining ma’lumotiga ko‘ra, qotil ehtimol «talaba yoshi»da bo‘lib, o‘q uzilgach, universitet hududida yig‘ilgan odamlar orasiga aralashgan. Bu holat uning aniqlanishini qiyinlashtirmoqda.

Voqea joyidan 30-kalibrli Mauser vintovkasi topilgan. Qurol sochiqqa o‘ralgan holda qoldirilgan bo‘lib, uning o‘qdonida otilgan gilza va magazinida uchta patron bor edi.

Tergovchilar aynan shu qurol Kirkni o‘ldirishda ishlatilgan bo‘lishi mumkinligini ta’kidlamoqda. Hozirda huquqni muhofaza qiluvchi organlar hodisaga aloqador shaxsni qidirishni davom ettirmoqda.

Fuqarolardan shubhali holatlar haqida tezkor ma’lumot berish so‘ralmoqda. Ekspertlarning fikricha, mukofot e’lon qilinishi jinoyatchini topishda muhim ahamiyatga ega.

Ko‘pincha fuqarolarning kuzatuvlari va shaxsiy ma’lumotlari tergov jarayonida hal qiluvchi rol o‘ynaydi. Shuning uchun barcha fuqarolar ehtiyotkorlik bilan harakat qilib, har qanday shubhali ma’lumotni tezda tegishli idoralarga yetkazishlari lozim.