Rossiya va Belarus “Zapad-2025” harbiy mashg‘ulotlarini boshladi
Rossiya va Belarus juma kuni “Zapad-2025” nomli qo‘shma harbiy mashg‘ulotlarni boshladi. Bu haqida Zamin.uz xabar berdi.
Ushbu mashg‘ulotlar ikki davlat hududida, shuningdek, Boltiq va Barens dengizlarida o‘tkazilmoqda. Mashg‘ulotlar davomida hujumni qaytarish va hududni himoya qilish bo‘yicha turli ssenariylar sinovdan o‘tkaziladi.
Unda Rossiya va Belarus bilan birga boshqa hamkor davlatlarning qo‘shinlari ham ishtirok etmoqda. Mazkur harbiy mashg‘ulotlar Polsha havo hududida Rossiyaga tegishli deb gumon qilingan dron urib tushirilganidan ikki kun o‘tib boshlandi.
Moskva bu hodisaga aloqasi yo‘qligini bildirgan, G‘arb esa uni provokatsiya sifatida baholagan. Polsha bosh vaziri mashg‘ulotlarni xavfli deb hisoblab, Belarus bilan chegara hududini yopishga qaror qildi.
Shu bilan birga, Litva va Latviya ham o‘z chegaralarida qo‘shimcha xavfsizlik choralarini kuchaytirmoqda. Ushbu voqealar mintaqadagi xavfsizlik va siyosiy vaziyatga jiddiy ta’sir ko‘rsatishi mumkin.
