Qozog‘istonning Olmaota viloyatida 11 sentyabr kuni kuchli portlash sodir bo‘ldi. Bu haqda Zamin.uz xabar berdi.
Ili tumani hududida joylashgan LGN Metal metall qabul qilish korxonasida yuz bergan ushbu hodisa natijasida uch nafar O‘zbekiston fuqarosi halok bo‘ldi. Bu haqida mahalliy ommaviy axborot vositalari xabar tarqatgan bo‘lsa, O‘zbekiston Migratsiya agentligi voqeani rasman tasdiqladi.
Hozirda marhumlarning jasadlarini O‘zbekistonga qaytarish uchun zarur rasmiylashtirish ishlari davom etmoqda. Portlash Bayserke qishlog‘ida sodir bo‘lgan.
Tuman politsiyasi tomonidan “Mehnat muhofazasi qoidalarini buzish hamda inson o‘limiga sababchi bo‘lish” moddasi asosida jinoyat ishi ochilib, tergov harakatlari olib borilmoqda. Korxona egasi Amirbek Sherbayevning so‘zlariga ko‘ra, metall chiqindilari orasida tankka qarshi minalar bo‘lishi ehtimoli mavjud.
Avval ushbu sex Xitoy kompaniyasi tomonidan ijaraga olingan va ular turli metall parchalarini arzon narxda sotib olgan. Ammo ularning ichida harbiy chiqindilar va ishlatilmagan mina bo‘lishi mumkinligi taxmin qilinmoqda.
Sherbayev portlash quyuv qismida sodir bo‘lganini ma’lum qildi. Aniq sabablar hozircha aniqlanmagan, biroq xavfli harbiy buyumlar aralashgan bo‘lishi ehtimoldan xoli emas.
Voqea joyiga barcha tegishli kuch va tashkilotlar yetib kelib, tekshiruv ishlarini boshlagan. O‘zbekiston Migratsiya agentligi halok bo‘lgan fuqarolarning yaqinlariga amaliy yordam ko‘rsatish maqsadida hududiy mas’ullarni biriktirganini bildirdi.
Shuningdek, Qozog‘iston tergov organlari bilan yaqindan hamkorlik qilinayotgani ta’kidlandi. Ushbu fojiali hodisa yuzasidan tergov ishlari davom etmoqda.
