Shimoliy Koreyada inson huquqlari sohasida jiddiy muammolar mavjudligi yana xalqaro hamjamiyat e’tiboriga tushdi. Bu haqda Zamin.uz xabar berdi.
Birlashgan Millatlar Tashkiloti tomonidan taqdim etilgan so‘nggi hisobotga ko‘ra, mamlakatda Janubiy Koreya seriallarini tomosha qilgan yoki tarqatgan fuqarolar og‘ir jazolarga duchor bo‘lmoqda. Ba’zi hollarda ular sud tomonidan o‘lim jazosiga hukm qilinganligi ma’lum qilindi.
BMTning inson huquqlari bo‘yicha missiyasi rahbari Jeyms Xinanning bildirishicha, 2014 yildan beri Shimoliy Koreyada aholi ustidan nazorat kuchaytirilgan. Yangi texnologiyalar yordamida kuzatuv tizimi joriy etilgan va ayniqsa COVID-19 pandemiyasi davrida jazolar yanada qattiqlashgan.
Hisobotda nafaqat siyosiy ayblovlar, balki oddiy huquqbuzarliklar uchun ham qatl jazosining oshgani qayd etilgan. Bu holat xalqaro hamjamiyatda katta tashvish uyg‘otmoqda.
Shu bilan birga, qamoqxonalardagi zo‘ravonlik holatlari oz miqdorda kamaygani va sud-huquq tizimida ayrim kichik islohotlar amalga oshirilayotgani ham ta’kidlangan. Biroq, BMT ekspertlari Shimoliy Koreyada bolalar mehnatining keng ko‘lamda davom etayotganidan xavotir bildirmoqda.
Ma’lumotlarga ko‘ra, o‘smirlar ko‘mir shaxtalari, qurilish ishlari va maxsus “zarbdor brigadalar”da majburiy mehnatga jalb qilinmoqda. Xalqaro inson huquqlari himoyachilari bu holatni eng jiddiy qonunbuzarliklardan biri deb baholamoqda.
Mutaxassislar Shimoliy Koreya hukumatini qatl jazosini bekor qilishga, majburiy mehnatni to‘xtatishga va inson qadrini hurmat qilishga chaqirmoqda.
