Qozog‘istonda o‘zbek kompaniyalari soni so‘nggi bir yil ichida sezilarli darajada oshdi. Bu haqda Zamin.uz xabar berdi.
Zakon.kz nashrining ma’lumotlariga ko‘ra, mamlakatda xorijiy mulkdorlikka ega yuridik shaxslar va chet el kompaniyalarining filiallari soni yil davomida 6 foizga o‘sdi. Bandlik va mehnat munosabatlari vazirligi bergan ma’lumotlarga ko‘ra, 2024 yil oktyabr oyida Qozog‘istonda faoliyat yuritayotgan xorijiy va qo‘shma korxonalar soni 59 mingdan oshgan bo‘lsa, 2025 yil sentyabr oyida bu ko‘rsatkich 74 mingdan oshdi.
Mutaxassislar fikricha, Qozog‘istonning geografik yaqinligi va iqtisodiy hamkorlik aloqalari xorijiy sarmoyadorlar uchun muhim omil hisoblanadi. Mamlakatda ro‘yxatdan o‘tgan va faoliyat ko‘rsatayotgan chet el kompaniyalari soni quyidagicha taqsimlangan: Rossiyadan 23 105 ta (17 496 tasi faol), O‘zbekiston 7 190 ta (5 473 faol), Xitoy 6 790 ta (4 950 faol), Turkiya 5 236 ta (3 344 faol), Qirg‘iziston 3 110 ta (1 943 faol), Ozarbayjon 1 612 ta (1 172 faol), Ukraina 1 298 ta (895 faol), Germaniya 964 ta (736 faol), Belarus 914 ta (731 faol).
Investitsiya oqimlarida o‘zgarishlar kuzatilmoqda. Masalan, Rossiya va Turkiya kompaniyalari soni biroz kamaygan, Rossiya kompaniyalari 23 533 tadan 23 105 taga, Turkiya kompaniyalari esa 5 444 tadan 5 236 taga tushgan.
Shu bilan birga, Xitoy kompaniyalari soni 5 217 tadan 6 790 taga oshgan. Eng yuqori o‘sish esa O‘zbekiston kompaniyalarida qayd etilgan.
2024 yil may oyida 4 595 ta bo‘lgan o‘zbek kompaniyalari soni 2025 yil sentyabr oyida 7 190 taga yetib, bir yil ichida 56 foizdan ortiq o‘sish ko‘rsatdi. Tahlilchilarning fikricha, bu jarayon Markaziy Osiyoda iqtisodiy integratsiya va o‘zaro hamkorlikning kuchayishidan dalolat beradi.
Qozog‘istonda xorijiy investitsiyalar hajmi oshib borayotgani mamlakat iqtisodiyotining barqaror rivojlanishiga ijobiy ta’sir ko‘rsatmoqda. Bu esa o‘z navbatida yangi ish o‘rinlari yaratish va iqtisodiyotni diversifikatsiya qilish imkoniyatlarini kengaytirmoqda.
