Isroil G‘azoda Shayx Radvonni tanklar bilan bostirdi
Isroil armiyasi G‘azo shahrining Shayx Radvon tumaniga tanklar va harbiy texnikalar bilan bostirib kirdi. Bu haqda Zamin.uz xabar berdi.
Urushdan oldin bu hudud eng gavjum joylardan biri bo‘lib, minglab odamlar yashagan. Hozirgi kunda qattiq hujumlar va bombardimonlar sabab ko‘plab aholi uylarini tark etishga majbur bo‘lmoqda.
Isroil bu operatsiyani Hammas jangchilarini yo‘q qilish va garovdagilarni ozod qilish maqsadida o‘tkazayotganini ma’lum qildi. Biroq xalqaro tashkilotlar bu amaliyotni qattiq tanqid qilmoqda va G‘azodagi vaziyat insoniylikka zid ekanligini ta’kidlamoqda.
Guvohlarning so‘zlariga ko‘ra, so‘nggi kunlarda tinimsiz bombardimonlar davom etmoqda, uylar va ko‘chalar jiddiy zarar ko‘rgan, shuningdek, suv va elektr ta’minoti ham izdan chiqqan. Minglab oilalar janubga qarab qochmoqda, ammo yo‘llarda tirbandlik va transport xarajatlarining keskin oshishi odamlar hayotini qiyinlashtirmoqda.
BMT ma’lumotlariga ko‘ra, avgust oyidan buyon 190 mingdan ortiq kishi G‘azodan chiqib ketgan, ammo yarim milliondan ko‘proq aholi hali ham hududda qolmoqda. Hamas sog‘liqni saqlash vazirligi 7-oktabrdan beri 65 mingdan ortiq odam halok bo‘lganini ma’lum qildi, ularning yarmi ayollar va bolalardir.
Voqealar jiddiy insoniy fojialarga sabab bo‘lmoqda va xalqaro hamjamiyatning diqqatini talab etmoqda.
