Kamchatkada 7,8 magnitudali zilzila yuz berdi
Kamchatka yarimoroli yana bir bor kuchli tabiiy ofatga duch keldi. Bu haqda Zamin.uz xabar berdi.
AQSh Geologiya xizmati ma’lumotlariga ko‘ra, 18 sentyabr kuni Petropavlovsk-Kamchatskiy shahri yaqinida 7,8 magnitudali zilzila yuz berdi. Ofat markazi shahardan taxminan 128 kilometr uzoqlikda, okean tubida, 10 kilometr chuqurlikda joylashgan.
Zilziladan so‘ng Amerika meteorologlari ehtimoliy sunami xavfi haqida ogohlantirdi. Shunga ko‘ra, Kamchatka o‘lkasi gubernatori Vladimir Solodov barcha xizmatlar yuqori tayyorgarlik rejimiga o‘tkazilganini bildirdi.
Mahalliy seysmologlar magnitudani 7,2 deb baholagan va yarimorolning sharqiy sohilida sunami xavfi e’lon qilingan. Hozircha qurbonlar yoki katta vayronagarchilik haqida ma’lumot yo‘q.
Shu bilan birga, qutqaruvchilar jamoat binolari va turarjoylarni tezkor tekshirish ishlarini boshladi. Mahalliy aholiga ehtiyot choralariga qat’iy rioya qilish tavsiya etilmoqda.
Mutaxassislar Kamchatka hududi tabiiy seysmik faol hudud ekanligini ta’kidlaydi. Bu yerda yashovchilar har qanday favqulodda vaziyatga tayyor bo‘lishlari zarur.
Kuchli zilzilalar nafaqat infratuzilmaga zarar yetkazadi, balki odamlarning ruhiy holatiga ham salbiy ta’sir ko‘rsatadi. Shu sababli mahalliy hokimiyat organlari barcha xavflarni oldini olish, aholini evakuatsiya qilish va qulay sharoit yaratish maqsadida zarur choralarni ko‘rmoqda.
Aholiga o‘z xavfsizligini ta’minlash uchun ko‘rsatilgan tavsiyalarga qat’iy rioya qilish tavsiya etiladi.
