Sankt-Peterburgda rekord miqdorda kokain musodara qilindi

Sankt-Peterburg shahrida Rossiya tarixidagi eng yirik giyohvandlik vositasining musodara qilinishi qayd etildi. Bu haqda Zamin.uz xabar berdi.

Ekvadordan kelgan “Cool Emerald” nomli kemada banan yuklari orasida 1,5 tonnadan ortiq kokain topildi. Rossiya Federal bojxona xizmati xabariga ko‘ra, 29 avgust kuni Sankt-Peterburg dengiz portiga yetib kelgan yukda kokain maxsus tarzda banan qutilari ichiga yashirilgan edi.

Bojxona va xavfsizlik xodimlari tomonidan o‘tkazilgan ko‘rikda 1500 dan ziyod briket musodara qilindi. Ularning umumiy og‘irligi 1750 kilogrammni tashkil etsa, sof kokain miqdori 1515 kilogrammga yetdi.

Briketlardan biriga “Fendi” deb yozilganligi e’tiborni tortdi. Mutaxassislar hisob-kitobicha, musodara qilingan kokainning qora bozorga qiymati taxminan 20 milliard rublga teng bo‘lib, bu 240 million AQSh dollaridan oshadi.

Rossiya Federal bojxona xizmati ushbu holatni mamlakat tarixidagi eng katta giyohvandlik vositasi musodara qilinishi deb baholadi. Hozirda Boltiqbo‘yi bojxona xizmati tomonidan Rossiya Jinoyat kodeksining 229.1-moddasi asosida jinoyat ishi qo‘zg‘atildi.

Ushbu modda giyohvand moddalarning o‘ta yirik miqdorda kontrabandasiga qarshi qattiq jazo, jumladan umrboq ozodlikdan mahrum qilish jazosi belgilanganligini bildiradi. Rasmiy manbalarga ko‘ra, narkotik vositalar kontrabandasida ayblanayotgan uyushgan jinoyiy guruh a’zolarini aniqlash va qo‘lga olish uchun tezkor-qidiruv va tergov ishlari davom etmoqda.

Bu holat mamlakat xavfsizligi va giyohvandlikka qarshi kurashning muhim qismi sifatida ko‘rilmoqda.