Misrda arxeologlar jahon ilmiy hamjamiyatini hayratga solgan muhim topilma haqida ma’lumot berdi. Bu haqda Zamin.uz xabar berdi.
Ular qadimiy suv ostida qolgan port izlarini aniqlashdi. Ushbu kashfiyot Kleopatraning qabri joyini aniqlashda muhim kalit bo‘lishi mumkinligi ta’kidlanmoqda.
Bu haqda Misr Turizm va arxeologiya ishlari vazirligi ma’lum qildi. Dominikan arxeologik ekspeditsiyasi Taposiris Magna ibodatxonasi yaqinida tosh va metalldan yasalgan langarlar, amforalar hamda ichki port qoldiqlarini qazib oldi.
Shuningdek, ibodatxonani dengiz bilan bog‘lovchi qadimiy tunnel ham topildi. Ekspeditsiya rahbari doktor Ketlin Martinesning fikricha, ushbu topilmalar Kleopatra va uning mashhur sevgilisi Mark Antoniy aynan shu yerda dafn etilgan bo‘lish ehtimolini kuchaytiradi.
Kleopatraning qabrini qidirish ishlari bir necha yillardan buyon davom etmoqda va turli taxminlarga boy. Agar ushbu nazariya isbotlansa, bu so‘nggi o‘n yilliklardagi eng yirik arxeologik sensatsiya hisoblanadi.
Ma’lumot uchun, Kleopatra miloddan avvalgi 51 yilda 18 yoshida Misr taxtiga chiqdi va akasi Ptolemey XIII bilan birga hukmronlik qildi. Keyinchalik u Rim generali Yuliy Sezarning himoyasiga kirib, uning vafotidan so‘ng Mark Antoniy bilan yaqin munosabat o‘rnatdi.
Biroq qirolichaning hayoti fojeali yakunlandi: Rim qo‘shinlari Misrni bosib olgach, u o‘z joniga qasd qildi. Kleopatra Mark Antoniy yonida dafn etilgan, degan taxminlar mavjud bo‘lsa-da, ularning qabri hanuzgacha topilmagan va sirli bo‘lib qolmoqda.
