Tramp BMTda Rossiya va Xitoyni tanqid qildi
AQSH prezidenti Donald Tramp Birlashgan Millatlar Tashkiloti Bosh Assambleyasining sessiyasida muhim bayonotlar bilan chiqdi. Bu haqda Zamin.uz xabar berdi.
U xalqaro maydondagi murakkab muammolarni hal qilishda BMTning katta imkoniyatlari borligini ta’kidladi, ammo hozircha bu imkoniyatlar to‘liq ishga solinmayotganini bildirdi. Tramp Xitoy va Hindistonni Rossiyaga Ukraina urushi bo‘yicha iqtisodiy yordam ko‘rsatayotgan davlatlar sifatida tanqid qildi.
Unga ko‘ra, agar Rossiya urushni to‘xtatmasa, AQSH o‘z qonunlari asosida Rossiyaga nisbatan jiddiy bojxona cheklovlarini joriy etishi mumkinligini ma’lum qildi. Amerika rahbari BMT minbarida xavfsiz va barqaror dunyo qurishga tayyor bo‘lganlarga Amerika yordam qo‘lini cho‘zishga tayyor ekanligini bildirdi.
Shuningdek, G‘azo sektoridagi qurolli to‘qnashuvlar darhol to‘xtatilishi, garovdagilar ozod qilinishi lozimligini ta’kidladi. Tramp Ukraina mojarosini hal qilish uchun izchil harakat qilayotganini, shu jumladan Rossiya prezidenti Vladimir Putin bilan yaxshi munosabatlarda ekanligini ham qayd etdi.
Bundan tashqari, u jahon hamjamiyatini biologik qurollarni ishlab chiqishdan butunlay voz kechishga chaqirdi. Yevropadagi migratsiya muammolariga ham to‘xtalib, ayrim mamlakatlarining vaziyati og‘ir ekanligini ta’kidladi.
Trampning so‘zlari xalqaro muammolarni hal etishda yanada qat’iy va aniq pozitsiyani qabul qilish zarurligini ko‘rsatadi.
