Xitoy internetda salbiy fikrlarni taqiqlaydi
Xitoy hukumati internetda tarqalayotgan salbiy kayfiyat va norozilikni targ‘ib qiluvchi foydalanuvchilarga qarshi ikki oylik keng qamrovli kampaniya boshladi. Bu haqda Zamin.uz xabar berdi.
Bu haqda 23 sentyabr kuni mamlakat Kibermakon boshqarmasining bayonotiga tayanib, “The Register” nashri ma’lumot berdi. Kampaniya doirasida Pekin hukumati ijtimoiy tarmoqlar, qisqa videolar platformalari, onlayn do‘konlar va reklama uchun ishlatiladigan striming xizmatlariga alohida e’tibor qaratmoqda.
Shuningdek, internetda qoldiriladigan izohlar ham sinchkovlik bilan tekshiriladi. Xitoyda taqiqlanishi mumkin bo‘lgan kontentlar orasida zo‘ravonlikka chaqiruvchi materiallar ham bor.
Biroq asosiy maqsad “mehnatning foydasi yo‘q”, “o‘qish befoyda” kabi salbiy kayfiyat va umidsizlikni targ‘ib qiluvchi postlarning tarqalishini to‘xtatishdir. Bu kabi fikrlar mamlakat yoshlari orasida keng tarqalgan “Sang madaniyati”ga xos bo‘lib, u yuqori yashash xarajatlari va iqtisodiy qiyinchiliklar tufayli norozilik va umidsizlikni ifodalaydi.
Kampaniyada oliy ma’lumotli yoshlarning yuqori darajadagi ish topishda duch kelayotgan qiyinchiliklari, shuningdek, ijtimoiy tarmoqlarda foydalanuvchilarga moslashtirilgan kontentning salbiy mavzularga chuqurroq kirib borishi ham hisobga olingan. Hukumat “hayotga nisbatan haddan tashqari pessimist qarashlar” va “o‘zini ortiqcha kamsitish” kabi mazmundagi postlarni ham nazorat qiladi.
Shuningdek, sun’iy intellekt yordamida yaratilgan zo‘ravonlikni tasvirlovchi materiallar ham taqiqlanadi. “The Register” xabariga ko‘ra, Pekin internet-trollarni “ko‘prik ostiga yashirish” kabi choralarni ham rejalashtirgan.
Fitna nazariyalari va soxta yangiliklarning tarqalishiga ham chek qo‘yiladi. Bunday kontentni yaratgan yoki tarqatgan platforma va shaxslar jazoga tortilishi mumkin.
Bu chora G‘arb mamlakatlaridagi oddiy “uzr” talab qilinishidan ancha qat’iy hisoblanadi. Manba kampaniyaning aniq boshlanish va tugash sanasini e’lon qilmagan.
