Ilon Mask Marsda mustaqil shahar qurishni rejalashtirmoqda
SpaceX kompaniyasi asoschisi va bosh direktori Ilon Maskning fikricha, agar og‘ir raketa tashuvchilar sohasida muhim yutuqlar amalga oshirilsa, insoniyat 2055-yilgacha Qizil sayyorada mustaqil va o‘zini o‘zi ta’minlaydigan shahar barpo etishi mumkin. Bu haqda Zamin.uz xabar berdi.
Uning ta’kidlashicha, buni amalga oshirish uchun taxminan 30 yil vaqt kerak bo‘ladi. Bu jarayonda har ikki yilda Marsga amalga oshiriladigan parvozlardan samarali foydalanib, u yerga yetkaziladigan yuk hajmini sezilarli darajada oshirish zarur.
Ilon Maskning aytishicha, yuk ko‘lamini oshirish juda muhimdir, chunki Marsda istiqomat qilish uchun turar joy modullari, robot yordamchilari, oziq-ovqat yetishtirish tizimlari, atmosferadan yonilg‘i ajratib olish texnologiyalari hamda mikrochiplar, kompyuterlar va raketalarni ishlab chiqarish uchun zarur bo‘lgan materiallar kerak bo‘ladi. Uning fikricha, haqiqiy mustaqillikka erishish uchun sivilizatsiyaning barcha asosiy tarkibiy qismlari Marsga yetkazilishi shart.
Kelajakda to‘liq qayta ishlatiladigan Starship V3 transport tizimi aynan shu vazifalarni bajarish uchun ishlab chiqilmoqda. Ushbu raketa 100 tonnadan ortiq yukni orbitaga olib chiqish imkoniga ega bo‘ladi.
Bu ko‘rsatkich hozirda qisman qayta foydalaniladigan Falcon Heavy raketasining imkoniyatlaridan taxminan 2,5 barobar ko‘pdir. Hozirgi kunda Falcon Heavy va Falcon 9 raketalarining yuqori bosqichi faqat bir marotaba foydalanishga mo‘ljallangan, Super Heavy va Ship esa to‘liq qayta ishlatilishi uchun yaratilgan.
Ilon Mask ma’lum qilishicha, Starship V3 raketasi taxminan 124,4 metr balandlikka ega bo‘ladi. Solishtirish uchun, Starship V2 versiyasi 121 metr bo‘lgan.
Ushbu yangi avlod raketa tizimi Marsga parvoz qila oladigan birinchi to‘liq modifikatsiya sifatida ishlab chiqilmoqda. SpaceX kompaniyasi kelgusi yil boshida Starship V3 yordamida Marsga ilk uchuvchisiz missiyalarni yo‘lga qo‘yishni rejalashtirmoqda.
Bu missiyalar Marsda mustahkam koloniyani tashkil etish yo‘lida muhim qadam bo‘ladi.
