Ilon Mask Marsda mustaqil shahar qurishni maqsad qilmoqda
SpaceX kompaniyasi asoschisi va bosh direktori Ilon Mask insoniyatning kosmosdagi kelajagi uchun yangi maqsadlarini ma’lum qildi. Bu haqda Zamin.uz xabar berdi.
Uning so‘zlariga ko‘ra, og‘ir yuk tashish imkoniyatiga ega raketalar texnologiyasidagi ilg‘or yutuqlar tufayli 2055-yilgacha Qizil sayyorada mustaqil va o‘zini-o‘zi ta’minlaydigan shahar barpo etish mumkin bo‘ladi. Maskning fikricha, ushbu loyihani amalga oshirish uchun Marsga parvozlar har ikki yilda bir marta ochiladigan orbital imkoniyatlarga asoslanadi.
Sayyoraga turar-joy modullari, oziq-ovqat ishlab chiqarish infratuzilmalari, energiya tizimlari, robot yordamchilar, shuningdek elektronika va raketa sanoati uchun zarur moddalar muntazam yetkazib turilishi talab etiladi. Hozirda SpaceX yangi avlod Starship V3 raketa tizimini ishlab chiqmoqda.
Bu tizim 100 tonnadan ortiq yukni orbitaga chiqarish imkoniga ega bo‘lib, butunlay qayta ishlatish tamoyili asosida qurilmoqda. Avvalgi versiyasi 121 metr bo‘lgan raketa, yangilangan V3 tizimida 124,4 metr balandlikka yetadi.
Kompaniya rejasiga ko‘ra, kelgusi yil boshida Starship V3 yordamida Marsga dastlabki uchuvchisiz missiyalar yuborilishi rejalashtirilgan. Ilon Maskning ta’kidlashicha, insoniyat boshqa sayyorada barqaror hayot kechirishi uchun sanoat, oziq-ovqat ta’minoti, energiya manbalari va texnologik tizimlar kabi barcha sivilizatsiya ustunlari bir vaqtning o‘zida joriy etilishi zarur.
