Starbucks AQSH va Yevropada do‘konlarini yopmoqda
Starbucks kompaniyasi moliyaviy qiyinchiliklar sababli AQSH va Yevropada ko‘plab qahvaxonalarini yopishga majbur bo‘lmoqda. Bu haqda Zamin.uz xabar berdi.
Kompaniya rasmiy ma’lumotiga ko‘ra, hozirda AQSHda 900 nafar xodim ishdan bo‘shatiladi va oy oxirigacha Shimoliy Amerikada taxminan 400 ta do‘kon faoliyati to‘xtatiladi. Yevropa hududida ham ayrim filiallar yopilishi mumkinligi aytilmoqda.
Starbucks rahbariyatining ta’kidlashicha, bu qarorlar xarajatlarni kamaytirish va daromadli hududlarda savdo hajmini oshirish maqsadida qabul qilindi. Yangi tartib mijozlar uchun qulayliklar yaratib, qahva xarid qilish jarayonidagi kutish vaqtini sezilarli darajada qisqartirishga yordam beradi.
Shuningdek, fevral oyida ham AQSHda 1100 ta ish o‘rni qisqartirilgan va menyu tarkibi optimallashtirilgan edi. Natijada, kompaniya bir yil ichida mamlakatda 2000 dan ortiq ish o‘rnidan voz kechishga majbur bo‘lmoqda.
Bosh direktor Brayan Nikkolning so‘zlariga ko‘ra, yangi qisqartirishlar nafaqat AQSH, balki Britaniya, Shveysariya va Avstriyadagi ayrim qahvaxonalarni ham qamrab oladi. Shu bilan birga, kompaniya Britaniyada 80 ta, Yevropa, Yaqin Sharq va Afrikada esa jami 150 ta yangi filial ochish rejasidan voz kechmagan.
Kompaniyaning iyul oyidagi hisobotidan ma’lum bo‘lishicha, AQSHda ochilgan bir yildan ortiq filiallarda sotuvlar ketma-ket oltinchi chorakda kamaymoqda. Bu bozor Starbucks uchun eng muhim hisoblanadi.
Sotuvlarning pasayishi natijasida kompaniya aksiyalari yil boshidan beri 8 foizga arzonlashgan. Moliya tahlilchilari bu holatni bir necha omillar bilan izohlamoqda.
Jumladan, TD Cowen mutaxassislari fikricha, AQSHda ommalashgan avtomobildan tushmasdan qahva sotib olish imkonini beruvchi "drive-thru" formatidagi kafelar Starbucks uchun kuchli raqobat hisoblanadi. Shuningdek, mijozlar orasida o‘tkazilgan so‘rovnomalar natijasida 70 foizdan ortiq xaridorlar narxlarning balandligi sababli Starbucksga tashriflarni kamaytirganini bildirgan.
Bundan tashqari, ayrim shaharlarda Starbucks baristalari kasaba uyushmalari orqali noroziliklarini ochiq ifoda etishni boshlagan. Bu esa kompaniya uchun qo‘shimcha muammo tug‘dirmoqda.
AQSH mehnat bozoridagi vaziyat ham murakkab bo‘lib, so‘nggi rasmiy statistikaga ko‘ra, ishsizlik va qisqartirish ko‘rsatkichlari kutilgandan yomonroq chiqmoqda. Ko‘plab tahlilchilar buni prezident Donald Trampning savdo siyosati bilan bog‘lamoqda.
Umuman olganda, Starbucks oldida jiddiy muammolar mavjud. Kompaniya qisqartirishlar orqali moliyaviy barqarorlikni ta’minlashga va yangi do‘konlar ochish orqali brend nufuzini saqlab qolishga intilmoqda.
