Eski avtomobillarni elektromobillarga almashtirish iqlim uchun foydali ekani tasdiqlandi
Benzin va dizel yonilg‘isida harakatlanadigan soz holatdagi avtomobillarni muddatidan oldin elektromobillarga almashtirish iqlim uchun foydali ekani ilmiy jihatdan tasdiqlandi. Bu haqda One.uz xabar beradi.
Shveysariya Federal energetika boshqarmasi buyurtmasiga ko‘ra tayyorlangan va yaqinda ochiqlangan hisobotga ko‘ra, mamlakatdagi mavjud avtomobillarning 90 foizini yangi elektr transportiga almashtirish atrof-muhitga chiqarilayotgan zararli gazlarni kamaytirishga xizmat qiladi. Tadqiqot natijalari shuni ko‘rsatadiki, hatto avtomobil hali foydalanishga yaroqli bo‘lsa ham, uning o‘rniga zamonaviy elektromobil sotib olish, ishlab chiqarish jarayonidagi chiqindilarga qaramay, uzoq muddatda tabiat uchun samaraliroq hisoblanadi.
Ushbu tadqiqot INFRAS kompaniyasi tomonidan o‘tkazilgan bo‘lib, unda avtomobilning butun hayot davri, ya’ni ishlab chiqarishdan tortib to utilizatsiya qilishgacha bo‘lgan jarayonlar to‘liq tahlil qilingan. Mutaxassislar avtomobilning kundalik foydalanishdagi sarf-xarajatlari va energiya manbalarini ham hisobga olishgan.
Olingan ma’lumotlarga ko‘ra, agar avtomobil yiliga kamida 8 ming kilometr masofani bosib o‘tsa, uni elektromobilga almashtirish ekologik jihatdan o‘zini to‘la oqlaydi. Biroq yiliga 5 ming kilometrdan kam harakatlanadigan transport vositalarini almashtirish iqlimga sezilarli ijobiy ta’sir ko‘rsatmaydi.
Xalqaro tajriba va ilmiy xulosalar AQSHning Kaliforniya universiteti olimlari tomonidan Science jurnalida chop etilgan mustaqil tadqiqot ham Shveysariya ekspertlarining xulosalarini qo‘llab-quvvatlaydi. Olimlar 400 dan ortiq avtomobil modellarini va ularning akkumulyator sig‘imlarini o‘rganib chiqib, 92 foiz holatda benzinli mashinadan voz kechish foydali ekanini aniqlashdi.
Tadqiqotga ko‘ra, yangi elektromobil ishlab chiqarishda havoga chiqariladigan zararli moddalar miqdori u bilan taxminan uch yil muntazam harakatlangandan so‘ng qoplanadi. Shuni ta’kidlash joizki, ushbu jarayonning samaradorligi eski avtomobilning keyingi taqdiriga ham bog‘liq.
Agar eski mashina to‘liq utilizatsiya qilinmasdan, ikkilamchi bozorda boshqa haydovchi tomonidan foydalanilsa, global miqyosda chiqindilar miqdori kamaymasligi mumkin. Shu sababli, ekspertlar nafaqat yangi texnologiyalarga o‘tishni, balki eski transport vositalarini tizimli ravishda muomaladan chiqarish masalasini ham muhim deb hisoblaydilar.
Mazkur ilmiy xulosalar kelajakda davlatlarning energetika va transport sohasidagi siyosatini belgilashda asosiy omil bo‘lib xizmat qiladi.
