NASA 2035-yilgacha Oyda doimiy qishloq quradi
AQSH Kosmik Tadqiqot Agentligi NASA yaqin o‘n yillik ichida insoniyat uchun yangi tarixiy bosqichni bosib o‘tishni maqsad qilgan. Bu haqda Zamin.uz xabar berdi.
Agentlik 2035-yilgacha Oy yuzasida odamlar doimiy yashay oladigan qishloq qurishni rejalashtirmoqda. Bu haqda NASA rahbari vazifasini bajaruvchi Shon Daffi Avstraliyaning Sidney shahrida o‘tkazilgan Xalqaro Astronavtika Kongressida ma’lum qildi.
Daffi ta’kidlaganidek, loyiha faqat ilmiy tadqiqotlar bilan cheklanmaydi. Oyda nafaqat tadqiqot markazi, balki barqaror yashash uchun zamonaviy infratuzilma ham barpo etiladi.
Yangi qishloq yadro energiyasi bilan ta’minlanadi, astronavtlar muntazam joylashtiriladi va qurilishda Oy yuzasidan olingan mahalliy materiallardan keng foydalaniladi. NASA rejasiga ko‘ra, 2026-yil fevralda «Artemida II» dasturi doirasida ilk bor to‘rt nafar astronavt Oyga yo‘l oladi.
Parvozda qo‘nish amalga oshirilmasa-da, asosiy maqsad keyingi bosqichlarga tayyorgarlik ko‘rish va Oyda uzoq muddat yashash imkoniyatlarini o‘rganishdir. Mutaxassislar fikricha, Oyda doimiy qishloq qurilishi Marsga inson yuborishda muhim poydevor bo‘ladi.
Chunki Oyda yaratiladigan infratuzilma insoniyatning kosmosda uzoq vaqt yashash qobiliyatini sinovdan o‘tkazishga xizmat qiladi. NASA vakillari bu g‘oyani orzu emas, balki amalga oshiriladigan aniq reja sifatida baholamoqda.
Bu tashabbus inson sivilizatsiyasini Yer orbitasidan tashqarida rivojlantirishga yo‘naltirilgan muhim qadam hisoblanadi.
