Danna Karagusova Markaziy Osiyodan koinotga uchadi
Qozog‘istonlik tadbirkor ayol Danna Karagusova Markaziy Osiyo tarixida koinotga chiqadigan ilk ayol sifatida tarixiy ahamiyatga ega bo‘lmoqda. Bu haqda Zamin.uz xabar berdi.
Uning bu muvaffaqiyati nafaqat mamlakat, balki butun mintaqaning ilm-fan va texnologiya sohasidagi yangi yutug‘i sifatida baholanmoqda. Ma’lumotlarga ko‘ra, Danna Amazon asoschisi va milliarder Jeff Bezos tashkil etgan Blue Origin kompaniyasining New Shepard raketa-kayhon apparatida koinotga uchadi.
Ushbu parvoz 2025 yil oktyabr oyida amalga oshirilishi rejalashtirilgan. Kosmik sayohatning davomiyligi atigi 10-12 daqiqa bo‘lib, shu vaqt ichida raketa Yerdan 100 kilometr balandlikka ko‘tariladi.
Aynan shu nuqtadan boshlab koinot hisoblanadi. Dannaga besh yo‘lovchi hamroh bo‘ladi: biznesmen Jeff Elgin, muhandis Clint Kelly III, startup asoschisi Aaron Newman, ukrainalik ishbilarmon Vitaliy Ostrovskiy va ismi oshkor qilinmagan yana bir yo‘lovchi.
Ular vaznsizlik holatini his qilgan holda Yerni koinotdan tomosha qilish imkoniga ega bo‘ladilar. Kompaniya parvozni jonli efir orqali namoyish etishni rejalashtirmoqda, ammo chipta narxlari sir saqlanmoqda.
Ma’lumotlarga ko‘ra, o‘rinni bron qilish uchun depozit kamida 150 ming dollar, parvoz narxi esa 500 mingdan 1 million dollargacha bo‘lishi mumkin. Danna Karagusova 43 yoshda bo‘lib, Olmaotada tug‘ilgan va Qozog‘istondagi eng faol va zamonaviy ayol tadbirkorlardan biridir.
U marketing va raqamli texnologiyalar sohasida yetakchi mutaxassis sifatida tanilgan. Danna First Media Group marketing xoldingini tashkil qilgan va uzoq yillar davomida uning rahbari bo‘lib ishlagan.
Shuningdek, u media va tadbirlarni boshqarishda 25 yillik tajribaga ega. Blue Origin ma’lumotlariga ko‘ra, Karagusova san’at, fan va texnologiyani uyg‘unlashtiruvchi innovatsion loyihalarda faol ishtirok etmoqda.
So‘nggi yillarda u kompaniyaning “Portals” deb atalgan yangi loyihasiga katta e’tibor qaratgan. Ushbu loyiha turli shaharlarni real vaqtda jonli video orqali bog‘laydigan interaktiv platformani yaratishni maqsad qilgan.
Danna nafaqat biznesda, balki sportda ham o‘zini sinab ko‘rgan. U Kilimanjaro va Elbrus tog‘ cho‘qqilarini zabt etgan tajribali alpinistdir.
Uning fikricha, koinot inson evolyutsiyasining navbatdagi tabiiy bosqichidir. Karagusova nufuzli oiladan chiqqan.
Uning onasi Guljana Karagusova Qozog‘istonning sobiq mehnat va aholini ijtimoiy muhofaza qilish vaziri hamda Senat a’zosi bo‘lgan. Akasi Farhod Karagusov moliya sohasida faoliyat yuritadi, u Qimmatli qog‘ozlar markaziy depozitariysi direktorlar kengashi a’zosi va Sky Bridge Capital kompaniyasida boshqaruvchi lavozimini egallaydi.
Ukasi Roman Romanov esa 2016 yildan buyon Pavlodar viloyati deputati bo‘lib, ilgari “Qozog‘iston alyuminiy” aksiyadorlik jamiyatini boshqargan. Shaxsiy hayotida Danna ijtimoiy tarmoqlarda faol bo‘lib, Instagram orqali hayoti, safarlari va kasbiy faoliyatini namoyish etadi.
U avval bloger Beybit Alibekov bilan turmush qurgan, ammo keyinchalik ajrashgan. Ular uch nafar farzandni birgalikda tarbiyalamoqda.
