Disneylendda yurak xurujidan ayol vafot etdi

AQSHning Kaliforniya shtatidagi Anaheim shahrida joylashgan Disneylend parklaridan birida 4-oktyabr kuni noxush voqea yuz berdi. Bu haqda Zamin.uz xabar berdi.

The Haunted Mansion attraksionida 60 yoshli ayol yurak xurujiga uchrab vafot etdi, deb mahalliy manbalar xabar berdi. Guvohlarning so‘zlariga ko‘ra, ayol sayohat davomida o‘zini yomon his qilgan.

Disneylend xavfsizlik xodimlari tezkorlik bilan yurak massaji ko‘rsatib, tez yordam chaqirishgan. Shifokorlar shifoxonada uning hayotini saqlab qolishga harakat qilgan bo‘lsa-da, muvaffaqiyatsiz bo‘lgan.

Politsiya va yong‘in-qutqaruv xizmati attraksionda texnik nosozlik aniqlanmaganini bildirdi. Orange okrugi sud-tibbiy ekspertizasi boshqarmasi hozirda marhumaning aniq o‘lim sababini o‘rganmoqda.

Disneylend boshqarmasi ayolning shaxsini oshkor qilmagan. Ma’muriyat bu voqeadan afsusda ekanini bildirib, barcha attraksionlar muntazam xavfsizlik tekshiruvidan o‘tishini ta’kidladi.

Shu bilan birga, yurak kasalliklari kabi tibbiy muammolari bo‘lgan mehmonlar orasida kutilmagan holatlar yuz berishi mumkinligi eslatildi. The Haunted Mansion Disneylendning eng mashhur attraksionlaridan biri bo‘lib, u arvohlar, illyuziyalar va maxsus audio-effektlar yordamida mehmonlarda qo‘rqinch va hayrat uyg‘otadi.

Xellouin bayrami arafasida esa ushbu attraksion yanada dahshatli muhitda bezatiladi. Ushbu voqea eng quvonchli joylarda ham inson sog‘lig‘i uchun mas’uliyat zarurligini yana bir bor ko‘rsatdi.