YouTube bloklangan kanallar uchun yangi imkoniyat berdi
YouTube platformasi “Ikkinchi imkoniyat” nomli yangi dasturini joriy etdi. Bu haqda Zamin.uz xabar berdi.
Ushbu dastur doirasida kanallari bloklangan ijodkorlar blokdan bir yil o‘tganidan so‘ng faoliyatlarini tiklash uchun ariza berish imkoniyatiga ega bo‘ladi. Bu tashabbus apellyatsiya emas, balki qoidalarni buzgan va shikoyat qilish imkoniyati tugatilgan foydalanuvchilar uchun mo‘ljallangan.
Har bir ariza alohida ko‘rib chiqiladi, bunda blogerning ilgari qilgan xatolari va YouTube hamjamiyati qoidalari inobatga olinadi. Ariza tasdiqlangach, ijodkor yangi kanal ochib, avvalgi videolarini qayta joylashtirish va monetizatsiya qilish huquqiga ega bo‘ladi.
Biroq, mualliflik huquqini buzgan foydalanuvchilar ushbu dasturdan foydalanolmaydi. YouTube’ning rasmiy ma’lumotiga ko‘ra, dastur haqida barcha foydalanuvchilarga yaqin kelajakda YouTube Studio orqali xabar beriladi.
Ushbu tashabbus Google kompaniyasining AQSh kongressmeni Jim Jordan bilan bo‘lgan muloqotidan so‘ng amalga oshirildi. Kompaniya bloklash siyosatini va ma’lumotlarning haqqoniyligini qayta ko‘rib chiqishni rejalashtirmoqda.
