Yevropa Ittifoqi rasmiylari Tojikistonning Rossiya prezidenti Vladimir Putinni hibsga olmaslik qarorini tanqid qildi. Bu haqda Zamin.uz xabar berdi.
EI Tashqi ishlar xizmatining matbuot kotibi Anitta Xipper bu borada o‘z fikrini bildirdi. Unga ko‘ra, Xalqaro jinoiy sudning hibsga olish orderi mavjud bo‘lishiga qaramay, Putin Dushanbedagi safari davomida hibsga olinmadi.
Tojikiston esa Xalqaro jinoiy sud a’zosi sifatida sudning talablarini bajarishi lozim edi. Xipperning so‘zlariga ko‘ra, Yevropa Ittifoqi Rossiyaning Ukrainadagi bosqinchilik urushi doirasida sodir etilgan jinoyatlar uchun javobgarlikni ta’minlash tarafdori hisoblanadi.
Inson huquqlari buzilishining oldini olish, qurbonlar adolatga erishishi va kelajakda shunday holatlar takrorlanmasligi uchun xalqaro tergovlarni qo‘llab-quvvatlash muhimdir. Shuningdek, EI Xalqaro jinoiy sud prokurorining Ukrainada olib borayotgan tekshiruvlarini davom ettirishini qo‘llab-quvvatlaydi va barcha davlatlarni sud bilan hamkorlik qilishga chaqiradi.
Ma’lumot uchun, 2023 yil 17 martda Xalqaro jinoiy sud Vladimir Putin va bolalar huquqlari bo‘yicha komissar Mariya Lvova-Belovaga hibsga olish orderi chiqargan edi. Ular ukrainalik bolalarni majburiy ravishda deportatsiya qilishda ayblanmoqda.
Tojikistondan oldin Putin Mo‘g‘ulistonga qilgan tashrifi davomida ham hibsga olinmagandi. Bu holat xalqaro maydonda turli munozaralarga sabab bo‘lmoqda.
Ba’zilari buni siyosiy ehtiyotkorlik deb baholasa, boshqalar xalqaro huquq normalarining ochiq buzilishi sifatida qabul qilmoqda. Yevropa Ittifoqi esa barcha davlatlarni xalqaro sud qarorlariga rioya qilishga chaqirmoqda.
