Qatar delegatsiyasi yo‘l-transport hodisasida halok bo‘ldi
11 oktyabr kuni Qatar delegatsiyasi G‘azo bo‘yicha tinchlik muzokaralarida ishtirok etish uchun yo‘lga chiqayotganda Misrning Sharm ash-Shayx shahri yaqinida yo‘l-transport hodisasiga uchradi. Bu haqda Zamin.uz xabar berdi.
Rasmiy manbalarga ko‘ra, Qatar protokol xizmatida ishlagan uch nafar diplomat halok bo‘ldi, yana uch kishi og‘ir tan jarohatlari bilan shifoxonaga yotqizildi. Ushbu hodisa Isroil va HAMAS o‘rtasidagi tinchlik muzokaralari davomida yuz berdi.
Muzokaralar Qatar, AQSh va Misr vositachiligida olib borilmoqda. Sharm ash-Shayx shahrida mintaqadagi qon to‘kilishni to‘xtatish, harbiy kuchlarni kamaytirish hamda garovdagilarni almashish bo‘yicha muhim uchrashuvlar o‘tkazilmoqda.
Ma’lum qilinishicha, tinchlik rejasi 10 oktyabr kuni kechasi kuchga kirdi. Muzokaralarda AQSh prezidenti, Misr prezidenti, Fransiya prezidenti, Ispaniya bosh vaziri va BMT bosh kotibi ishtirok etmoqda.
Qatar delegatsiyasi ushbu jarayonda faol vositachi sifatida qatnashmoqda. Transport halokati tinchlik jarayoniga qanday ta’sir qilishini rasmiylar hali ma’lum qilgani yo‘q.
Xalqaro siyosatchilar va kuzatuvchilar bu voqeani juda nozik va og‘ir yo‘qotish deb baholamoqda. Qurbonlar soni ortishi ehtimoli ham mavjudligi aytilmoqda.
