Tramp Isroilda HAMASni qurolsizlantirishni e’lon qildi
Amerika Qo‘shma Shtatlari prezidenti Donald Tramp 13 oktabr kuni Isroil parlamenti Knessetda nutq so‘zladi. Bu haqda Zamin.uz xabar berdi.
Uning chiqishi deputatlar tomonidan iliq qarsaklar bilan kutib olindi. Tramp bu tashrifini hayotidagi muhim voqealardan biri deb atadi.
Prezident so‘zlariga ko‘ra, HAMAS tinchlik kelishuvida qurolsizlanish bandini qabul qilgan. U bu voqeani tinchlikning boshlanishi sifatida baholadi va G‘azo sektoridagi uzoq davom etgan mojaroning tugaganini ta’kidladi.
Knesset spikeri Amir Ohana Trampga yuksak baho berdi va uning Tinchlik uchun Nobel mukofotiga nomzodligini ilgari surishni taklif qildi. Isroil muxolifati rahbari Yair Lapid esa nutqida ezgulik va yovuzlik mavjudligini, HAMAS yoki Eron rejimi tarafida bo‘lganlar zulm tomonida ekanini bildirdi.
Tramp so‘zlagan paytda ikki deputat “genotsid” yozuvi tushirilgan plakat ko‘targani uchun zal chiqarib yuborildi. Prezident Isroilga ko‘rsatilgan harbiy yordam haqida ham gapirdi.
U Bibi Netanyahudan kelgan so‘rovlar asosida eng zamonaviy va samarali qurollarni yetkazib berganini aytdi. Trampning ta’kidlashicha, G‘azoni demilitarizatsiya qilish rejasi mintaqadagi ko‘plab davlatlar tomonidan qo‘llab-quvvatlanmoqda.
HAMAS qurolsizlantiriladi va Isroil xavfsizligi ta’minlanadi. Shuningdek, HAMAS garovdagilarni bosqichma-bosqich ozod qilmoqda.
Birinchi guruhda 7, ikkinchisida 13 kishi Isroilga qaytarilgan. Tuzilgan bitimga ko‘ra, garovdagilar evaziga Isroil qamoqxonalaridan 250 nafar umrbod jazoga hukm qilingan falastinlik mahbus va urushdan keyin hibsda bo‘lgan 1700 kishi ozod etilishi ko‘zda tutilgan.
Shu tariqa, Donald Trampning Isroildagi nutqi nafaqat diplomatik jarayon, balki jahon siyosatida yangi tarixiy bosqich sifatida baholanmoqda. Bu nutq mintaqada tinchlik o‘rnatishga qaratilgan muhim qadam sifatida qabul qilinmoqda.
